InFocus BigTouch, un novo ordenador todo-en-un cunha pantalla táctil de 55 polgadas

Aproveitando as posibilidades táctiles de Windows 8, InFocus presenta o seu novo equipo todo-en-un BigTouch, que integra un ordenador completo nun monitor táctil de 55 polgadas Full HD capaz de detectar ata 5 puntos en pantalla, permitindo así o seu uso colaborativo por parte de varias persoas á vez. Tamén inclúe un rato e un teclado sen fíos, de xeito que temos un equipo con grandes posibilidades, especialmente para demostracións comerciais e para usos educativos.
O InFocus BitTouch soporta xestos táctiles en pantalla, inclúe 2 portos Gigabit Ethernet, Wi-Fi, 2 portos HDMI, 6 portos USB e unidade SSD de 120 Gb, así como un procesador Intel Core i5, polo que debería ter potencia dabondo para a meirande parte das funcións. Terá un prezo de 4.999 dólares (3.884,47 euros) e enviarase co software Mondopad, que achega numerosas funcións colaborativas como videoconferencia, anotación dixital sobre documentos, encerado electrónico interactivo, unha interface personalizable e Microsoft Office 2010.

Mondopad achega numerosas funcións colaborativas ás grandes pantallas táctiles