Industria destina outro millón de euros para proxectos TIC relacionados co Xacobeo 2010
luns, 26 de abril do 2010
A estas alturas do ano, seguro
que son poucas as persoas que non saben que se está a celebrar o Ano Santo 2010
no noso país, e que esa chegada masiva de peregrinos á nosa capital é debida á
decisión de moitos turistas a cruzar a porta santa antes de que volva a pechar
por uns once anos máis.
O que non se sabe tan ben
é que a Xunta de Galicia, a través da Consellaría de Economía e Industria, está
a subvencionar a creación de proxectos empresariais innovadores relacionados
coas TIC que axuden a promocionar o Camiño e que, de paso, entre outras cousas,
colaboren na dixitalización das ferramentas empregadas para guiar aos
visitantes no seu periplo ata Compostela.
Así é que o Diario
Oficial de Galicia (DOG) de hoxe, publica
nas súas páxinas a convocatoria de subvencións para proxectos empresariais
de innovación da Consellaría de Economía e Industria, que vai destinada a
financiar accións innovadoras no ámbito das tecnoloxías da información e as
comunicacións (TIC) relacionadas co Xacobeo 2010.
Esta convocatoria, que
conta cunha dotación dun millón de euros, complementa a concesión de axudas para
o mesmo concepto que foi adxudicada en decembro de 2009 por valor doutro millón
de euros, pola que tamén se financiaban proxectos innovadores para o Camiño de
Santiago baseados nas novas tecnoloxías.
Esta iniciativa, ademais
de servirlle ao Goberno galego para promocionar o Xacobeo 2010, tamén xurde
como unha oportunidade única de desenvolvemento empresarial para Galicia,
incidindo na innovación como factor de competitividade e polas novas liñas de
negocio que o Ano Santo pode abrir para sectores estratéxicos na comunidade,
como é o caso do turístico.
Segundo informan dende a
Consellaría de Economía, na convocatoria contémplanse como proxectos
subvencionables “aqueles que supoñan unha aplicación innovadora das TIC á
prestación de servizos de valor engadido para os turistas, peregrinos e público
en xeral interesado no Xacobeo 2010, considerando especialmente as
infraestruturas precisas para aplicacións baseadas en dispositivos móbiles,
localización ou xeoreferenciación, redes sociais e web 2.0”.
Tamén se inclúen na orde “aquelas iniciativas destinadas á creación
tecnoloxicamente innovadora de contidos e aplicacións informáticas relacionadas
coa promoción do Xacobeo 2010 e a valorización do seu patrimonio artístico,
histórico e cultural. Dentro das aplicacións informáticas consideraranse de
especial interese os desenvolvementos propios”.
Asemade, poderán
acollerse a este programa as iniciativas relacionadas coas infraestruturas
tecnolóxicas e ferramentas destinadas á creación, difusión ou mellora de
servizos audiovisuais de interese para a promoción ou soporte das actividades
do Xacobeo 2010.