InfoJC bota man de tecnoloxía de Gradiant para facilitar a tódolos colectivos as vantaxes do fogar dixital
xoves, 22 de marzo do 2012
A empresa de Vigo InfoJC vén de adquirir unha
licenza de recoñecemento biométrico desenvolvido polo centro galego Gradiant. Con esta tecnoloxía, a firma
galega proxecta unha manchea de novidades para o ámbito doméstico-tecnolóxico,
con vistas a centrar o labor de desenvolvemento nos colectivos con meirande
risco de exclusión dixital. Máis polo miúdo, InfoJC facilitará o acceso a servizos,
contidos e comunicadores dos usuarios do fogar dixital “con máis limitacións, xa que estes poderán ser recoñecidos de xeito
biométrico, co fin de incrementar a súa calidade de vida e a súa accesibilidade”.
Por outra banda, a adquisición tamén suporía,
en palabras de InfoJC, un pulo decisivo á transferencia de coñecemento na nosa
terra, amosándose polo miúdo as moitas vantaxes xeradas a través da colaboración
entre un centro tecnolóxico e unha empresa, neste caso unha PEME, “o tamaño de empresa menos habitual neste
tipo de operacións”. Isto vén a conto polo seguinte dato: a preocupante
situación de España a nivel mundial no eido da innovación empresarial. De feito,
o país ocupa o posto 39 no ranking,
cunha baixada progresiva. Isto, informa InfoJC, “está directamente relacionado co desaproveitamento do coñecemento
desenvolvido por centros, universidades e investigadores na empresa; debemos
recordar que España é un dos países con máis de mil publicacións científicas ao
ano, que, porén, teñen unha escasa aplicación e un impacto deficiente no
mercado”.
O acordo establecido entre Gradiant e InfoJC,
engaden, representa unha inversión desta tendencia e unha proba palpábel de que
é posíbel levarlle a contraria ás estatísticas.
O desenvolvemento transferido consiste nun
motor de recoñecemento facial e identificación biométrica que abrolla,
directamente, das investigacións nas que Gradiant leva xa un tempo traballando e das que
temos falado xa en Código Cero. Esta tecnoloxía busca facilitar o acceso a
servizos, contidos e comunidades, facendo especial fincapé, como dixemos, nas
persoas con dependencias ou con diversidades funcionais ou de tipo motriz. Esta
colaboración tecnolóxica, que non é nova no ámbito Gradiant-InfoJC, é “un novo exemplo de posta en valor e
colaboración nun intre onde a competitividade por medio da innovación preséntase
como unha necesidade”, manifesta a empresa.
Para Javier Cebreiros, responsábel de
Proxectos de InfoJC, estamos ante a manifestación dunha estratexia, a de buscar
innovación de vangarda na nosa terra, de gran potencial: “Se en Galicia contamos con centros de excelencia, porque buscar fóra o
coñecemento? Ou peor aínda: por que desenvolvelo un mesmo? A colaboración con
Gradiant foi excepcional e seguirá tendo éxito, facéndonos tirar proveito das
nosas capacidades ao máximo”.
Luis Sestelo, xerente do Gradiant, opina o
seguinte sobre esta colaboración: “Tanto
no noso centro como nos diferentes axentes de investigación da Comunidade temos
moito coñecemento de valor para as empresas, a clave está en adaptalo á realidade
do mercado e transferilo, moito máis nunha situación como a actual”.