Innogando, entre as empresas agrotech de meirande proxección en España
martes, 4 de outubro do 2022
- Elio López García no Campus Terra da USC
A
nosa terra estase a converter nun referente en transformación do
sector agrario. Proba disto é o importante papel que xogan empresas
como Innogando, startup
do Campus Terra (Campus de Lugo da USC) impulsada polo veterinario
Elio López que
figura xa no top 15 de firmas do ámbito agrotech con
meirande proxección de mercado (datos publicados por El
Referente, a revista líder de información sobre novas firmas
innovadoras en España), un
eido de actividade (o
agrotech)
no que tamén teñen un papel destacado outras puxantes spin-off
luguesas como TimberSoul
by Cándido Hermida, iBoneLab, TasteLab, 3eData ou startups
como Aleutos ou Aobá Upciclyn.
Volvendo
a Innogando, empresa agromada na sede universitaria luguesa a
iniciativa do entón estudante de Veterinaria de Cospeito, Elio
López, actual director executivo (CEO), ten o obxectivo de mellorar
o grao de benestar do sector agrogandeiro a través da achega de
recursos tecnolóxicos para empresas, produtores e que tamén
redunden en beneficio do consumidor final. Nesta liña, Elio López
destaca recursos e servizos como a robótica, a conexión a Internet
con baixo consumo enerxético, os drons e, entre outras tecnoloxías,
as ferramentas de sensórica e recollida de datos, como “avances
que reportan beneficios para o desenvolvemento do sector agrogandeiro
e da súa industria”.
A
inclusión de Innogando na dita listaxe de firmas máis puxantes do
agrobiotech non é o único recoñecemento deste ano á
empresa luguesa. De
feito, o pasado mes de marzo foi a gran vencedora galega do certame
Premios Emprendedor XXI, convocados por Caixabank e a Empresa
Nacional de Innovación (ENISA), co obxectivo de “identificar,
recoñecer e acompañar ás novas empresas con gran potencial de
medre”. O premio incluíu unha dotación económica de 6.000 euros,
formación internacional especializada impartida por ESADE e expertos
de Silicon Valey e o acceso a investidores e grandes empresas
interesadas no ecosistema emprendedor.
Máis
sobre Innogando
Innogando traballa no sector de
agrotech ou smart farming. O
obxectivo desta nova firma innovadora é dixitalizar o sector
gandeiro para mellorar a calidade de vida do gandeiro, a
rendibilidade da súa granxa e o benestar animal. Para iso deseñou
de maneira íntegra diversos desenvolvementos tecnolóxicos, entre os
que destaca Rumi, un dispositivo de monitoraxe do gando que conta cun
asistente virtual e axuda a xestionar e a tomar decisións cos datos
que recolle. Tamén é de deseño e fabricación propia Eliter, unha
marca de tenreiros baseada na rastrexabilidade do seu status
sanitario e condicións de orixe, que permite revalorizar este grupo
de animais. O persoal de Innogando está formado por gandeiros,
veterinarios e enxeñeiros informáticos e electrónicos.