Investigadores do CITIC da UDC crean unha web para facer monitoraxe da evolución do COVID-19
mércores, 1 de abril do 2020
A
nosa investigación tecnolóxica segue adiante, acadando grandes
fitos dende os límites á actividade presencial do Estado de Alarma
e o seguimento exhaustivo das súas disposicións. O Centro de
Investigación TIC é un exemplo disto e, tamén, de recursos humanos
e tecnolóxicos ao servizo da loita contra a pandemia. Hoxe o
centro deu a coñecer que o seu investigador Carlos Fernández Lozano
puxo en marcha unha páxina web que permite facer monitoraxe e
seguimento da evolución do COVID-19 en España. A idea xurdiu a
partir do traballo realizado polo investigador Rubén Fernández
Casal, que comezou a capturar os datos do Ministerio de Sanidade
relativos aos contaxios.
Esta
iniciativa colaborativa conta co respaldo do comité de expertos da
Acción Matemática contra o Coronavirus do Comité Español de
Matemáticas (CEMat), a través do seu presidente Ricardo Cao, tamén
investigador do CITIC, que ten o obxectivo de axudar ao Goberno
central a atopar solucións ante a crise sanitaria.
A
páxina web permite consultar os datos do número de casos confirmados
afectados por Comunidades Autónomas nas últimas semanas, así como
os pacientes recuperados e os decesos. O investigador das áreas de
Intelixencia Artificial e de Ciencia e Enxeñaría de Datos do CITIC
e profesor da Facultade de Informática da UDC, Carlos Fernández
Lozano, apunta que a idea é “introducir máis información
relacionada con ingresos en UCI, incidencia, número de
hospitalizacións, etc., e incluír modelos preditivos para utilizar
a plataforma como punto de unión de múltiples investigacións”.
Deste xeito, o sitio web permitirá aportar máis claridade sobre a
evolución da pandemia en España.
Respecto
das tarefas a realizar, o investigador do CITIC Rubén Fernández
Casal encárgase da descarga de datos e procesado desde orixe,
mentres que Carlos Fernández Lozano creou a ferramenta a partir do
procesamento destes datos. Tamén están traballando para mellorar o
rendemento e a capacidade de carga do sistema.