J-Stars Victory VS+ sae á venda para as consolas de Sony

Para os afeccionados de series de animación xaponesas como One Piece, As Bolas Máxicas, Bleach, O Dr. Slump e Arale, Naruto, Los Caballeros del Zodíaco ou Kenshin, chega hoxe ás tendas J-Stars Victory VS+, un títulos de loita de 1 contra 1 ou 2 contra 2, que finalmente está ao alcance dos usuarios europeos de PlayStation 4, PlayStation 3 e PlayStation Vita.
Máis de 50 personaxes do manga e o anime enfróntanse neste xogo que xa saíu no Xapón hai un par de anos, e que por fin podemos gozar en Europa con algunhas novidades, especialmente na versión de PS4, que incluso conta cun exclusivo modo Arcade.
Este título chega para celebrar o 45º aniversario da revista Shonen JUMP e o 20º aniversario da revista V JUMP, auténticos referentes da banda deseñada e a animación no Xapón, que mesturan os seus personaxes nun xogo que permitirá visitar escenarios dos mundos das distintas franquías que recrea, de xeito que podemos revivir o combate entre Son Goku e Freezer, realizar as técnicas de Naruto, ver como Gachan axuda a Arale a derrotar aos seus inimigos ou comprobar se o Cabaleiro de Pegaso pode superar en combate ao guerreiro do espazo Vexeta. Toda unha sorte de combinacións que deixarán impresionados aos seareiros deste completo cadro de loitadores saídos do manga.