Jawbone presenta novos dispositivos medidores de actividade

mércores, 5 de novembro do 2014 Marcus Fernández

Jawbone leva xa 3 anos apostando pola súa liña de pulseiras cuantificadoras UP, que serven para medir a nosa actividade física e a calidade do noso sono, conseguindo unha boa aceptación por parte do público, de aí que non cesasen na súa evolución, até a UP3, que presume de ser o dispositivo deste tipo máis avanzado do mercado que presenta un tamaño máis compacto que o modelo predecesor (a UP24).
A pulseira UP3 presume da súa fiabilidade para a monitorización cardíaca e de revolucionar o xeito de facer tal, pois fuxiron do uso de sensores ópticos (polo seu elevado consumo) para optar por utilizar tecnoloxía de bioimpedancia, o que permite unha boa autonomía e a captura de máis valores que o pulso (como o ritmo respiratorio e a resposta galvánica da pel). A UP3 é resistente á auga e a súa batería pode durar até 7 días seguidos cunha única carga.

Os datos recollidos polos accesorios de Jawbone poden analizarse comodamente dende aplicacións móbiles

A información recollida pola pulseira pode logo empregarse para medir o rendemento dos adestramentos físicos, para analizar o comportamento do noso corpo en repouso e incluso a calidade do noso sono (para o que fan uso de numerosos sensores), servindo así para axudar a adoptar hábitos de vida saudables, xa que permite analizar non só a actividade física, senón tamén os efectos da alimentación, a hidratación, a ansiedade e incluso o consumo de cafeína sobre o noso ritmo cardíaco. Estas informacións incluso poden consultarse directamente dende o móbil.


Vídeo promocional da pulseira UP3 de Jawbone

O UP Move pode levarse prendido nun peto para maior comodidade

Esta pulseira ten un prezo de venda de 179 dólares, o que pode afastar a moitos usuarios, de aí que Jawbone presentase tamén o UP Move, un pequeno trebello que custa só 49,99 dólares, e que busca servir de podómetro e medidor do exercicio e das calorías consumidas durante o día, así como rexistra o número de horas de sono de calidade. Está composto por unha peza circular que pode colocarse nunha funda-correa para levar no pulso, aínda que tamén inclúe un accesorio en forma de pinza que facilita así que o levemos prendido nun peto ou noutro elemento da nosa roupa para poder levalo enriba máis comodamente (aínda que, loxicamente, para as funcións de medición do sono o máis recomendable é levar o trebello no pulso). A súa batería promete unha autonomía de 6 meses.


Vídeo promocional do dispositivo UP Move de Jawbone

PUBLICIDADE