Kutruparty 2012: na ponte de decembro conectámonos na Estrada

luns, 22 de outubro do 2012 Fernando Sarasketa

Para os que queiran encontro informático, dicirlles que o mes de decembro comeza cunha das grandes citas galegas para a mocidade en liña: a Kutruparty, que chega á súa novena edición. A xuntanza, que se celebra entre os días 6 e 9, ten como centro de operacións a vila pontevedresa de A Estrada, máis polo miúdo os pavillóns da Fundación do Moble, onde se agarda dar acollida a centos de participantes. O encontro, organizado pola asociación AUSLAE, abrirá en breve o prazo de inscrición para concorrer nas diferentes actividades do programa. Isto farase a través da web. Porén, sempre e cando haxa prazas libres, tamén se pode formalizar no propio recinto. O custe será igual có dos últimos anos: 25 euros.
O programa de actividades irase actualizando na páxina web a medida que se vaian confirmando novidades, informa a organización. O equipo responsábel do encontro está a facer un esforzo especial para que este ano a oferta de accións de tipo lúdico sexa particularmente completa, tanto no recinto propio e específico para os rapaces e rapazas conectado/as como no escenario Extranet.
Deste xeito, haberá torneos con League of Legends, Counter Strike: Global Offensive, StarCraft 2, FIFA 13, concursos para pór a proba os coñecementos cinematográficos dos asistentes e a súa habilidade na dobraxe, probas de destreza con aplicacións informáticas de retoque fotográfico e de vídeo, obradoiros e concursos de deseño de gráficos en 2D e 2D, etc. Amais do devandito, tamén haberá espazo, unha vez máis, para dar acubillo ao KUBO, unha área específica para consolas Wii, Play Station 3, Xbox 360, consolas consideradas clásicas e unha réplica de recreativas arcade.
Asemade, a organización reforzará a vertente didáctica do encontro, cun emprazamento habilitado como obradoiro e como laboratorio informático. Este contorno, chamado HackConf, servirá entre outras cousas para acoller charlas, relatorios e talleres prácticos como os que citamos de seguido:
· Arduino, plataforma de hardware libre para iniciarse na programación de robots e automatización.
· Construción dunha máquina recreativa, creación da nosa propia consola.
· Linguaxes de programación
· Virtualización.
· Seguridade básica (contrasinais, conexións sen fíos...)
· Desenvolvemento de videoxogos.
· Community Manager: consellos e trucos para formármonos nunha profesión de moda, o xestor de comunidades e la importancia de saber relacionarnos nas redes sociais.
· Impresora 3D (contarase cunha impresora 3D montada polos membros de AUSLAE desde cero).
Extranet
Como dixemos, o equipo organizador prepara achegar unha terceira liña de actividade na Extranet, un espazo-recinto alternativo para actividades participativas que non teñen relación directa coa informática e co que se quere acadar que a xente “despegue os ollos da pantalla do computador”. Con este motivo, achégase a seguinte listaxe de contidos (que se irá completando os días vindeiros):
· Origami, creacións en papel
· O Muro, panel de varios metros onde se poderá dar renda solta á arte grafiteira.
· Lanzamento de disco.
· Lanzamento de avións de papel.
· Pachangas futbolísticas no pavillón “Coto Ferreiro”.
· Ciclo de cinema alternativo, con auténticos subprodutos cinematográficos.
· Campionato de póker.

PUBLICIDADE