Lleida estrea un sistema de SMS certificados
xoves, 7 de febreiro do 2008
- Presentación da nova plataforma SMS no concello de Lleida
O concello de Lleida converteuse no primeiro
consistorio español en realizar notificacións oficiais a través de mensaxes de
texto a través do móbil grazas á operadora Lleida.net,
que creou un sistema de SMS certificado coa mesma validez das cartas
certificadas ou do burofax.
A presentación deste novo servizo consistiu na estrea do mesmo, remitindo
por SMS á veciña da vila, Patricia Von Der Horst, a concesión dun microcrédito
para crear unha tenda de artigos de coiro arxentino con cargo ó programa
municipal de promoción de actividades empresariais entre mulleres.
Ángel Ros, alcalde de Lleida, enviou a notificación á Von Der Horst a través
dunha aplicación desenvolvida por Lleida.net, que servirá para comunicar multas
ou sancións, retrasos no pagamento de tributos, resultados de procesos de
inscrición e, en xeral, para calquera comunicación que forme parte do proceso
administrativo do concello, aínda que polo momento se limitará a «trámites relacionados con actividades
organizadas polas concellarías de Xuventude, Servizos Persoais ou Cultura».
O sistema implantado xera un documento PDF que se envía por correo electrónico ó
remitente da mensaxe SMS certificada, que se pode utilizar coma proba ante
calquera tribunal, por incluír un recibo asinado e selado dixitalmente, o que
permite un importante aforro nas comunicacións certificadas, posto que cada
mensaxe só custa 54 céntimos fronte ós 6,75 euros que custa un burofax.