Marvel vs. Capcom: Infinite está a desenvolverse con Unreal Engine 4

luns, 5 de decembro do 2016 Marcus Fernández

Dende os anos 90 os xogos de loita de Capcom cruzáronse cos personaxes da Marvel, permitido que os loitadores de sagas como Street Fighter puidesen loitar con membros dos X-Men ou dos Vingadores, converténdose nun importante referente dos xogos de loita en 2D, pero que finalmente van dar un importante salto adiante ao pasar a ser un xogo desenvolvido en Unreal Engine 4 en Marvel vs. Capcom: Infinite, de xeito que os combates de 2 contra 2 desta nova produción estarán procesados en 3D, conseguindo así unha estética máis realista e fuxindo da aparencia de banda deseñada das anteriores entregas.
Este novo xogo presentouse a pasada fin de semana no marco da PlayStation Experience 2016, e ofrecerá varios modos para un xogador e tamén contidos multi-xogador, de xeito que o choque de universos que propoñen promete ser moi diverso, aínda que o punto forte desta saga é, sen dúbida, o poder controlar a personaxes que nun principio non terían que poder enfrontarse nunca, como Iron Man, Ryu, Mega Man X ou a Capitana Marvel, a quen irán uníndose novos loitadores, sen esquecer a malvados como o androide Ultrón.
Aínda que polo momento son poucos os detalles que se coñecen deste impresionante xogo de loita, está confirmado que sairá á venda para PlayStation 4 a finais de 2017.

Vídeo de presentación de Marvel vs. Capcom: Infinite

PUBLICIDADE