MasterCard trae a España o seu sistema de verificación de identidade mediante selfies

Para conseguir unhas transaccións económicas máis seguras dende MasterCard levan tempo flirteando coa biometría, e agora está a levar as súas probas da tecnoloxía Identify Check Mobile a varios países europeos (Austria, Bélxica, República Checa, Dinamarca, Finlandia, Alemaña, Hungría, Países Baixos, Noruega, Suecia, Reino Unido e España) despois de experimentarse coa mesma nos EE.UU. e Canadá, de xeito que para o ano que vén pretenderían implantar globalmente o seu sistema de verificación de identidade a través de selfies.
Esta solución de MasterCard buscaría evitar os problemas de ter que teclear longos contrasinais, e a través dunha aplicación móbil facilitaría a identificación do usuario mediante pegada dixital ou selfie, sendo esta última opción a máis curiosa, pola súa reducida fiabilidade (aínda que a aplicación pide ao usuario que pestanexe para distinguilo dunha fotografía).
Este sistema de verificación pretende axilizar enormemente o proceso de pagamento da nosas compras en liña, aínda que falta por ver se consegue imporse este método ou ten que ceder o relevo a tecnoloxías de compañías como Apple, Samsung ou Google.