Modernización destina preto de 8 millóns de euros para axudas a empresas do sector TIC

Segundo se recolle en dúas resolucións que se publicarán nos vindeiros días no Diario Oficial de Galicia, a Secretaría Xeral de Modernización e Innovación Tecnolóxica, departamento que dirixe Mar Pereira, vai aprobar dúas convocatorias de axuda destinadas ao sector empresarial TIC por un importe de preto de 8 millóns de euros dos cales se destinarán 5.375.748 euros a subvencionar proxectos de cooperación para o fomento da empresa dixital.
As devanditas resolucións achegan que as iniciativas que se presenten deberán abordarse desde a cooperación entre empresas e contar cun promotor que lidere o proxecto demandando novos produtos e servizos das Tecnoloxías da Información e a Comunicación e, a lo menos, cun socio tecnolóxico con capacidade para prestar eses servizos ou produtos. A tarefa de promoción ou liderado pode ser asumida por empresas ou asociacións empresariais, debendo traballar conxuntamente e acadar éxito no proxecto. Tamén deberán permitir que os socios tecnolóxicos poidan aplicar o coñecemento acadado a outros interesados do mesmo ou distintos sectores económicos.
A convocatoria de axudas contempla actuacións subvencionables, tanto na demanda empresarial en solucións TIC como na resposta tecnolóxica en solucións TIC. A primeira opción está orientada para que as empresas e asociacións empresariais de calquera sector económico poidan identificar tarefas, problemas e situacións concretas da súa actividade empresarial que necesitan novos produtos e servizos das Tecnoloxías da Información e a Comunicación. No segundo caso, as subvencións para a resposta tecnolóxica en solucións TIC está destinada a empresas que desenvolven a súa actividade económica especificamente no ámbito das Tecnoloxías da Información e a Comunicación para que poidan poñer en marcha novos produtos e servizos que resolvan tarefas, problemas e situacións concretas da actividade empresarial da entidade líder do proxecto de cooperación.
Mar Pereira anunciou que o seu organismo “potenciará o desenvolvemento do sector empresarial da sociedade da información cunha achega de 2.550.000 euros”, os cales servirán para completar dúas liñas de axudas: a das capacidades e a dos desenvolvementos TIC das empresas galegas.