Montblanc conectará os seus reloxos de pulso mediante un accesorio na súa correa

A idea de integrar a intelixencia aos reloxos de pulso a través da súa correa que Kairos propón a través de Indiegogo parece estar a callar, e a propia Montblanc quere percorrer o mesmo camiño, de xeito que na súa nova colección Timewalker Urban Speed incluirá unha correa que converterá os seus reloxos mecánicos nun trebello electrónico wearable.
Para converter os reloxos de Montblanc en smartwatches presentan unha e-Strap, cunha correa de pel con textura de fibra de carbono que na súa parte inferior inclúe un módulo electrónico que podería mercarse de xeito independente, o que facilitará que os consumidores non teñan que elixir entre mercar un reloxo de luxo ou un dispositivo conectado, senón que poderán sumar ambos mundos.
A e-Strap conta cunha pantalla táctil OLED de 0,9 polgadas cunha resolución de 128 x 36 píxeles que será onde se amosarán notificacións que cheguen do smartphone, de xeito que limitaríase a operar como receptor de información sobre chamadas, mensaxes de texto, correos electrónicos, eventos do calendario, redes sociais e recordatorios, aos que se engadirían funcións de monitor de actividade, e que podería controlarse mediante unha aplicación para iOS e Android, ou sexa, que contaría con funcións moi básicas. Comunicaríase co teléfono mediante Bluetooth 4.0 e tamén contaría con vibración para as alertas e podería aproveitarse para, por exemplo, facer a función de disparador remoto da cámara do smartphone. Grazas a non ser un smartwatch moi avanzado e cunha grande pantalla, non padecerá a súa principal eiva, e non terá que cargarse a diario, senón que a e-Strap terá unha autonomía de até 5 días, podendo recargarse mediante un porto micro USB. As súas dimensións son de 40 x 14,2 x 9 milímetros, o que pode considerarse como un engadido demasiado voluminoso para colocar na correa dun reloxo.
A Montblanc e-Strap venderíase solta por uns 250 euros, o que parece un prezo moi axustado se temos en conta que é un accesorio para reloxos que tenden a superar os tres mil euros.