NBA Elite 11 incluirá unha copia descargable de NBA Jam

O xogo de baloncesto NBA Jam destacou non seu día por encarar o xénero deportivo dun xeito orixinal, con partidos de 2 contra 2 con saltos imposibles, mates estratosféricos e tapóns altísimos, levando o arcade a un nivel extremo e que, pese a ser un título case paródico, mantiña un nivel gráfico excelente, especialmente nas súas entregas para máquinas recreativas e agora, tras meses de rumores, anuncian que vai volver coma un xogo descargable para PlayStation 3 e Xbox 360 que poderán obter de balde os compradores de NBA Elite 11 (nome que vai tomar a franquía NBA Live este ano), advertindo que non vai ser posible adquirilos na PlayStation Network ou no Bazar de Xbox LIVE.
A nova versión de NBA Jam contará con 3 modos de xogo (partida rápida, campaña clásica e Online de ata 4 xogadores) e gráficos en alta definición, aínda que tamén haberá unha entrega deste título para a Wii, que incluirá un modo de xogo exclusivo chamado Remix Tour no que poderá xogarse contra lendas da NBA coma Magic Johnson.