Nace Noso Capital para apoiar a transformación tecnolóxica e a innovación das nosas PEME
xoves, 4 de xullo do 2019
- Daniel Prieto, Vicente Espert, Antonio Couceiro e Tomás Pérez
Esta
semana presentouse en Santiago un novo instrumento para impulsar a
innovación empresarial, o emprendemento e a transformación
tecnolóxica. Estamos a falar de Noso
Capital, a primeira sociedade xestora de entidades de
investimento colectivo constituída con capital privado galego
(autorizada para a dita actividade pola Comisión Nacional de Mercado
de Valores). O obxectivo básico de Noso Capital, segundo se fixo
saber, é ofrecer ás PEME da nosa terra unha alternativa de
financiamento e apoio á xestión que lles permita coller impulso e
madurar.
A
entidade foi presentada onte aos medios de comunicación de Galicia,
nun acto celebrado en Santiago de Compostela e no que participaron
varios directivos da entidade: Tomás Pérez Moreno, conselleiro
delegado; Antonio Couceiro, conselleiro da área de Estratexia;
Daniel Prieto, conselleiro da área de Novas Tecnoloxías, e Vicente
Espert, conselleiro da área Económico-Financeira.
Segundo
explicou Pérez Moreno, “a iniciativa xorde da análise da contorna
e da constatación de que tradicionalmente o capital-risco non
prestou atención de abondo ás empresas de pequeno tamaño”. Isto,
engadiu, unido á progresiva concentración do sector financeiro, fai
“que as pequenas e medianas empresas teñan poucas alternativas á
hora de atopar recursos eficientes para financiar os seus plans de
crecemento”.
Noso
Capital porá o foco en firmas cunha facturación de entre 5 e 50
millóns de euros anuais, e un EBITDA entre 0,5 e 2 millóns. Con tal
obxectivo, elaborará prospeccións en sectores como o industrial, o
agroindustrial, a forestal-madeira, os produtos do mar ou as novas
Tecnoloxías da Información e a Comunicación (TIC). Ás súas
participadas, Noso Capital brindaralles non só soporte financeiro,
senón tamén, e sobre todo, “un apoio profesional cualificado á
xestión”, con vistas a acelerar o seu camiño cara á
consolidación e o medre, tanto a nivel galego como estatal e
internacional. Outro dos grandes retos fundamentais é axudar ás
PEME a acometer retos de tanta relevancia como afrontar a
dixitalización e adaptarse aos novos modelos da Industria 4.0.
A
entidade prevé alcanzar investimentos por valor de 20 millóns de
euros no vindeiros tres anos, aínda que as súas perspectivas de
traballo son a longo prazo.