O 2011 concluirá cunha administración 100% telemática
martes, 3 de maio do 2011
A secretaria
xeral de Modernización e Innovación Tecnolóxica, Mar Pereira, foi a encargada
de inaugurar hoxe a xornada As Relacións
da Empresa coa Administración Electrónica, que organiza en Compostela o
Colexio de Enxeñaría en Informática de Galicia.
Na súa
intervención, Pereira lembroulle ás persoas asistntes que un dos obxectivos do
Plan de Modernización da Administración é que a finais de 2011, o 100%
dos procedementos da directiva de servizos “se
poidan realizar telematicamente”.
Ata o de agora,
a Xunta permite presentar online do redor de 120 procedementos administrativos,
e está previsto que "de cara ao
2013, se acade o 100% de tramitación en liña dos mesmos”.
Deste xeito, o Goberno
galego poderá relacionarse coa cidadanía e as empresas de maneira máis eficiente
e próxima, botando man de todas cantas vantaxes ofrecen as novas tecnoloxías; algo
que xa ten iniciado coa aprobación do Decreto que establece o marco de
desenvolvemento da Administración electrónica na Administración pública galega e
sobre o que xa se avanzou nalgúns dos seus obxectivos. Así, a edición
electrónica do DOG é unha realidade desde o pasado luns; xa se puxo en marcha o
plan que permitirá a acreditación dixital do empregado público e estase a traballar
para que a Web da Xunta albergue a sede electrónica este ano.
No marco deste proceso de modernización da Administración tamén
se acadou a implantación da factura electrónica, que funciona con regularidade,
e púxose en marcha o Sistema de Licitación Electrónica (SILEX), sacando a
concurso público os cinco primeiros expedientes que permiten a presentación de
ofertas de forma electrónica
Mar Pereira concluíu a súa intervención lembrando que “Galicia é a terceira comunidade autónoma con maior
uso da Administración electrónica para obter información das páxinas web e a
quinta en descarga e cumprimentación de formularios oficiais”; datos
moi positivos que confirman que se está a avanzar polo bo camiño na implantación
e uso das novas tecnoloxías e Internet na Administración.
