O Acer Aspire R7 sitúase a medio camiño entre o portátil e o todo-en-un

venres, 3 de maio do 2013 Marcus Fernández

Acer está a dar a coñecer varios equipos con Windows 8, entre os que podemos destacar o novo Aspire R7, que vén a ser un híbrido entre ordenador portátil e todo-en-un, xa que conta cunha pantalla táctil Full HD de 15,6 polgadas e un sistema que permite colocar a pantalla en distintas disposicións: como un portátil ordinario ou repousada sobre o teclado para adoptar forma de tablet. Cómpre destacar que o touchpad está pouco accesible no curioso deseño deste equipo, que podería resultar demasiado raro para a meirande parte dos usuarios.
O equipo non queda curto en prestacións, e chegará ao mercado norteamericano o vindeiro día 17 a un prezo que parte dos 1.000 dólares, podendo equiparse cun procesador Intel Core i5, disco duro de 500 Gb, unidade SSD de 24 Gb, 6 Gb de RAM, 3 portos USB, HDMI e lector de tarxetas SD, polo que cubriría as necesidades de case calquera usuario.

O Acer Aspire R7 ten un curioso sistema para orientar a súa pantalla

PUBLICIDADE