O Apalpador estrea novo vídeo nas redes sociais
martes, 11 de decembro do 2018
O
Apalpador, o carboeiro do Courel que baixa das montañas no Nadal
para facer presentes á rapazada, vén de incrementar a súa presenza
nas redes sociais. Sobre todo, logo da incorporación aos faladoiros
dixitais dun novo vídeo-clip impulsado pola Escola de Ensino Galego
Semente de Compostela. A
Cançom do Apalpador, lanzada
ás redes en colaboración co Concello de Santiago, insírese nun
programa máis amplo de actividades, todas elas destinadas a mostrar
“ante as crianças a figura infantil do gigante do Courel”. A
primeira iniciativa é o lanzamento do dito vídeo, gravado in
situ na propia casa do
Apalpador.
Na
realización da canción participaron mais de dez artistas, entre os
que se contan Luis Vallecillo, Karlos Abal, Séchu Sende, Guadi
Galego, Celtia Figueiras, Pablo Sanmamed, María Pámpano, Paulo
Silva, Jerry Noia ou Ramón Campos. O vídeo representa o carboeiro
como “um ser mágico no seu entorno natural, diante da sua casa,
acompanhado polas crianças da montanha”.
Amais
do devandito vídeo-clip, os días vindeiros as redes sociais irán
recibindo máis novidades sobre o xigante do Courel, tamén achegadas
pola Escola Semente e a Gentalha do Pichel, entre os que se conta o
vídeo O Apalpador sai do Courel, un audiovisual informativo
que mostra ao xigante das montañas de Lugo preparándose para levar
presentes a Compostela e ao resto do país.