O CESGA e a USC impulsan un proxecto tecnolóxico-arqueolóxico para pescudar a pegada fenicia na nosa terra
venres, 10 de xuño do 2016
- Restos dun antigo peirao de atraque en Aguiño, Ribeira, crese que de orixe fenicia
A semana que vén, o 16
de xuño, vaise presentar no Museo do Mar de Galicia (en horario de
17.00 a 20.00 horas) o Proxecto
Estrímnides para o estudo da presenza fenicia na nosa terra
durante o primeiro milenio antes de Cristo. Máis polo miúdo,
trátase dunha xuntanza para avaliar e dar conta en detalle do dito
proxecto, impulsado por un equipo de investigación formado por
membros da Universidade de Santiago de Compostela, a Universidade de
Sevilla e o Centro de Supercomputación de Galicia (CESGA). A
iniciativa, a maiores, está financiada polo Ministerio de Economía
e Competitividade. Segundo nos conta a USC (o Grupo de Estudos para a
Prehistoria do Noroeste ibérico), Estríminides ten por obxecto
estudar a presenza no Noroeste peninsular (Galicia e Norte de
Portugal) do devandito pobo procedente da costa leste mediterránea
(unha das culturas máis ricas da antigüidade, con gran influencia
na contorna europea en materia de arte, comercio e navegación,
principalmente).
De feito, o proxecto
centrase en investigar as relacións comerciais que as comunidades do
noroeste mantiveron con pobos do sur da Península Ibérica e o
Mediterráneo en xeral.
A dita cita terá xeiras
de traballo previas. Así, a semana do 13 ao 17 de xuño, os
investigadores sevillanos desenvolverán a súa primeira estadía de
traballo en Galicia para facer una serie de actividades que impulsen
o estudo dos materiais arqueolóxicos de procedencia mediterránea
recuperados en castros galegos. Estas actividades incluirán a visita
a arqueoteca da Universidade de Santiago de Compostela e o Museo do
Mar, o Museo de Pontevedra e o Museo de San Antón en Coruña.
A semana, engade o dito
Grupo, culminará na devandita reunión de traballo do día 16.
Celebrarase no Museo do Mar para presentar os obxectivos do proxecto
á comunidade arqueolóxica galega. Nesta reunión intervirán Josefa
Rey Castiñeira, Javier Rodríguez Corral da Universidade de Santiago
de Compostela, Emilio Abad do CESGA (Centro de supercomputación de
Galicia) e Eduardo Ferrer Albelda, Francisco José García Fernández
e Antonio Sáez Romero (Universidad de Sevilla) e o arqueólogo Juan
Naveiro Lopéz.
No caso de Emilio Abad,
dará conta das vantaxes e funcionalidades da
ferramenta IDEPatri como recurso de traballo para o proxecto
Estrímnides. Como lembraremos, IDEPatri ten como finalidade
principal o acceso a datos de temática arqueolóxica, sobre todo da
cultura castrexa. É o resultado da estreita colaboración entre o
CESGA e o GEPN (Grupo de Estudos para a Prehistoria do Noroeste
ibérico), xunto con outros investigadores e institucións, que
permitiu o deseño dunha Infraestrutura de Datos Espaciais (IDE) para
o intercambio de información a través de Internet. En palabras do
CESGA, a ferramenta “propón un sistema operacional de xeración e
provisión de datos xeoespaciais derivados da práctica
arqueolóxica”. Esta plataforma permite aos profesionais “coñecer
o estado das investigación que se están levando a cabo, e tamén,
ao integrar este coñecemento en Internet, ofrecer os seus contidos a
calquera outra persoa”, engade o Centro de Supercomputación de
Galicia.