O CNTG anuncia para decembro un seminario sobre rendemento en bases de datos Oracle

mércores, 2 de novembro do 2011 Raquel Noya

O vindeiro 12 de decembro, o Centro de Novas Tecnoloxías de Galicia (CNTG) vai celebrar un seminario técnico sobre Tuning e axustes de rendemento en bases de datos Oracle, que precisamente impartirán 2 profesionais certificados por esta última firma.
O seminario, que se desenvolverá entre as 9:30 e as 13:30 horas, vai dirixido especialmente a administradores/as de bases de datos, administradores/as de sistemas que desexen mellorar os seus coñecementos e habilidades na administración de bases de datos Oracle, administradores/as de Data Warehouse, enxeñeiros/as de soporte, consultores/as técnicos e, en xeral, interesados/as con coñecementos no manexo de bases de datos relacionais.
Os relatores convidados a este evento son José Álvarez, con máis de 14 anos de experiencia impartindo cursos no eido das bases de datos, e Carlos Zárate, instrutor de Oracle University e especialista en desenvolvemento de aplicacións SOA e BPM.
Ámbolos dous relatores contan con diferentes certificacións en calidade de expertos, como por exemplo a de Oracle Certified Profesional Administrator Database 11g e Oracle Certified Perfomance Tuning Expert, que ten Álvarez; e as de Oracle Serviced Oriented Architecture Infraestructure Implementation Certified Expert coas que conta Zárate no seu currículo.
O prazo de inscrición estará aberto ata o vindeiro 9 de decembro.

PUBLICIDADE