O Campamento Tecnolóxico de Rianxo formou unha importante canteira de expertos en prrogramación
mércores, 17 de agosto do 2022
Finalmente chegou
ao seu remate o Campamento Tecnolóxico do Concello de Rianxo,
unha actividade formativa de verán que durante dúas semanas, do 1
ao 12 de agosto, achegou a 16 mozos e mozas rianxeiros varias
actividades relacionadas con diferentes eidos das novas ferramentas.
Os contidos cubriron un amplo abano temáticas, pero sempre enfocando
as actividades ao desenvolvemento da creatividade.
Por exemplo, houbo sesións artísticas e musicais
(con obxectos interactivos, mediante circuítos electrónicos),
obradoiros de videoxogos para a creación de personaxes, deseño web
con HTML e CSS, programación web con Javascript para o deseño de
xogos e creatividade con GDevelop e Artuino. O programa tamén
incluíu unha actividade para converter á rapazada participante en
gamers por un día, complementándose coa preparación dun
evento en streaming.
O campamento veu da man do Servizo de Xuventude do
Concello, e tivo o obxectivo de fomentar e impulsar a canteira local
de tecnólogas e tecnológos. Foron, segundo informou Xuventude de
Rianxo, “accións formativas de marcado carácter creativo
orientadas a rapaces e rapazas de idades comprendidas entre os 12 e
os 17 anos”. O número de participantes foi de 16
A finalidade destes obradoiros foi “favorecer un
uso práctico, creativo pero tamén crítico da tecnoloxía, á vez
que igualitario, nos que haxa unha participación equitativa entre
nenos e nenas, rachando con estereotipos de xénero”, explicaron
fontes do Concello.