O Centro Demostrador TIC dá acubillo o día 26 a un seminario sobre Google Apps para as nosas PEME

A empresa Redegal será a encargada de impartir as sesións

Seguimos a falar de aplicacións, das súas vantaxes e dos xeitos de poñernos ao día en materia de desenvolvemento destas ferramentas. Unha cuestión, por certo, que vén moi a conto tendo en conta o importante potencial de negocio que amosa este sector do deseño de ferramentas para o móbil. Pois ben, non é preciso irnos lonxe para formarnos nestas materias, xa que por unha banda temos ao CNTG poñéndonos ao día en materia de recursos para iOS e, pola outra, ao Centro Demostrador TIC (emprazado tamén no CNTG) argallando un seminario sobre as utilidades das Google Apps para pequenas e medianas empresas. Esta actividade (Google Apps para PEME) vén da man da Axencia para a Modernización Tecnolóxica de Galicia (AMTEGA) e desenvólvese o mércores 26 de febreiro.
O obxectivo deste obradoiro, a desenvolver de 10:00h a 14:00 horas, é achegar aos profesionais galegos as distintas utilidades que ofrecen as aplicacións do buscador, “unha suite baseada no modelo de computación na nube que arestora xa empregan máis de 5 millóns de empresas en todo o mundo”, informa AMTEGA. O seminario será impartido pola empresa ourensá Redegal, socia oficial de Google Apps, que conta cunha ampla experiencia na implantación desta solución, e mesmo en materia de divulgación na nosa terra, tal e como temos reflectido polo miúdo dende Código Cero. Para este seminario, a empresa galega acompañarase de diversas firmas da nosa xeografía que xa teñen implantado Google Apps no seu negocio e que compartirán con todos os asistentes a súa experiencia no uso destas ferramentas.
Segundo apunta AMTEGA, “as solicitudes para asistir en persoa a este seminario superaron amplamente o número inicial de prazas ofertadas, o que da conta da boa acollida entre o tecido empresarial galego”. Para superar estes atrancos físicos e de dispoñibilidade dos interesados, o evento será transmitido por videoconferencia ás aulas CeMIT.
Lembrar que as Google Apps son unha opción moi tenda en conta por profesionais de todo o mundo para levar as empresas de seu á nube. Achega ferramentas e servizos como Gmail, Google Calendar, Google Drive ou Google Sites. Este paquete fornece a maiores múltiples utilidades, “como poden ser a creación de documentos e calendarios, facendo especial fincapé en compartir estes con outros usuarios, ou traballar de forma colaborativa desde calquera lugar ou dispositivo”, explica AMTEGA.