O Clúster TIC Galicia celebra a súa asemblea ordinaria co maior incremento de socios da súa historia
xoves, 17 de xuño do 2021
- Antonio Rodríguez del Corral, presidente do Clúster TIC Galicia
O
Clúster
TIC Galicia celebra este 17 de xuño a súa asemblea ordinaria, no
edificio CINC da Cidade da Cultura. Faino ademais apoiado polo
“maior incremento de socios da súa historia” (con 15 novas
incorporacións dende a última asemblea, celebrada o 30 de setembro
do ano pasado) e cun amplo apoio aos proxectos recentes da entidade,
como o impulso á conversión da antiga Fábrica de Armas da Coruña
na Cidade das TIC ou as medidas para avanzar na internacionalización
das empresas galegas.
Durante
a asemblea, que se poderá seguir de forma presencial ou en remoto,
presentarase perante os socios o informe económico de xestión do
2020, así como o orzamento e a proposta de actividades deste ano
para a súa aprobación. Asemade, exporanse os últimos progresos e
os vindeiros pasos para avanzar na Cidade das TIC, en palabras do
Clúster “un proxecto estratéxico para o futuro da entidade” e
que, segundo reflicte, “está a acadar unha resposta moi positiva
por parte do tecido empresarial TIC galego”. A organización
empresarial lembra que o dito interese ficou patente “na alta
demanda de espazos rexistrada na primeira convocatoria para ocupar o
Centro de Servizos Avanzados, para o que se conseguiu un
financiamento de 4,8 millóns de euros”.
Neste
último ano, o Clúster TIC Galicia concentrou os seus esforzos en
levar a cabo accións centradas en fortalecer o sector e impulsar a
transformación dixital das empresas galegas a través da
participación activa nos hubs de innovación dixital Dihgigal
e DATAlife. Tamén, fixo especial fincapé na capacitación de perfís
tecnolóxicos a través de iniciativas propias, colaboracións
público-privadas e coa participación no Campus Dual para resolver
“a preocupante diferencia entre a oferta e a demanda de
profesionais do sector”.
Actualmente,
o Clúster TIC Galicia está conformado por cento quince socios,
entre grandes empresas (14), pemes (80), emprendedores (19), centros
tecnolóxicos (2) e colexios e asociacións profesionais (1), que
supoñen unha facturación conxunta de máis de 780 millóns de euros
e un total de 11.785 traballadores.