O Colexio de Xornalistas presenta unha web de seu “para visitar todos os días”
xoves, 26 de novembro do 2015
- Manuel Barreiro, Xosé Manuel Pereiro e Anxo Pérez Romariz
O
Colexio Profesional de Xornalistas de Galicia presentou hoxe en
Santiago (Facultade de Xornalismo) un feixe de novidades destinadas a
incrementar a marxe de interacción colaborativa entre os colexiados
e entre estes e a cidadanía. Por unha banda, a entidade deu a
coñecer a súa nova web, xornalistas.gal,
desenvolvida pola empresa galega A Navalla Suíza e presentada hoxe
como “unha web para habitala”. Asemade, o Colexio achegou datos
sobre o proxecto Xornalismo na Escola e sobre un novo servizo de
espazo de traballo para os membros da entidade, na súa propia sede
en Santiago. Na presentación estiveron presentes o decano do
Colexio, Xosé Manuel Pereiro; Anxo Pérez Romariz, responsábel de
Comunicación de la Caixa en Galicia; e Manuel Barreiro, de A Navalla
Suíza. Respecto da nova web Pereiro dixo que a intención é
convertela na páxina de inicio dos nosos xornalistas, “non algo
que se visita de cando en vez”.
Segundo
engadiu, o sitio en liña acabado de presentar é unha adaptación ás
novas tendencias e correntes web da actualidade: “Unha adaptación
de algo que xa era bo, a páxina previa, pero que cumpría facer máis
visual, máis útil, máis dinámica e máis acaida para os novos
dispositivos de acceso”, sexan da índole que sexan.
Como
dixemos, o novo espazo foi desenvolvido por A Navalla Suíza (que
recunca achegando a súa experiencia e bo facer ao Colexio, logo de
ter desenvolvido -esta mesma empresa- a anterior versión da páxina).
En representación da firma emprazada en Milladoiro (Ames) participou
no acto de hoxe Manuel Barreiro, quen describiu o resultado do
proxecto como un esforzo por poñer ao Colexio en meirande sintonía
coas redes sociais (que teñen na web especial presenza) e cos novos
estilos e formatos de traballo. De feito, sinalou, trátase ante todo
dun espazo de comunicación e, tamén, dunha caixa de ferramentas que
fortalece o concepto de oficina global e sen límites espaciais. Cara
a isto precisamente (cara esta vontade de aplicar en xornalistas.gal
semellantes utilidades ás que lle son propias ao instrumento que dá
nome á empresa) diríxese unha das seccións máis salientábeis da
nova páxina, a sección Ferramentas,
que acubilla unha cumprida listaxe de recursos lingüísticos e
informáticos (Transcritor de Audios, OrtoGal, LinguaKit, Conxugador
Cilenis, Conxugador Verbix, Google Translate, Opentrad, etc) para
facilitar o labor do xornalista. Segundo engadiu Barreiro, estamos
“perante un bazar colaborativo” de ferramentas, un repositorio
que se irá incrementando cada pouco e que se complementa con
seccións tan destacadas como a Biblioteca,
que funciona como un gran acubillo de material xornalístico
(dossiers, informes, documentación, guías de medios, etc). “É
unha web máis do noso tempo”, engadiu, lembrando que para o seu
desenvolvemento tamén se fixo especial fincapé no deseño
responsive
que permite unha accesibilidade e empregabilidade total dende os máis
variados dispositivos móbiles. Sobre as comparacións (inevitábeis)
coa anterior páxina do Colexio, Barreiro informou que a nova
proposta é máis dinámica, fluída e líquida, en contraposición
coa web previa, máis estruturada, sólida e arquitecturizada.
Polo
que respecta ao proxecto Xornalismo
na Escola. presentado tamén hoxe, é unha iniciativa nova que
ten o apoio da Obra Social La Caixa e que se encamiña a pór en
marcha sesións pedagóxicas en aulas de 3º e 4º da ESO de centros
de toda a xeografía galega. “Preténdese achegar ós máis novos,
de forma práctica, diferentes aspectos da comunicación, dos medios
e das novas tecnoloxías”, fixo saber o CPXG, que será o encargado
de seleccionar de entre as propostas recibidas, a seis colexiados e
colexiadas en procura de emprego que se encargarán de impartir as
sesións e elaborar as unidades didácticas. Anxo Pérez Romariz
comentou que a Obra Social leva xa algún tempo realizando este
proxecto noutras zonas como Catalunya, Sevilla e Madrid, no que
xornalistas en paro imparten xornadas didácticas sobre comunicación
a alumnos de educación secundaria.
Xosé
Manuel Pereiro rematou a rolda de prensa avanzando “que en breve
porase a disposición dos colexiados un servizo de uso de despacho
para atender ás necesidades dos xornalistas que puntualmente
precisen dun espazo para traballar ou manter unha reunión”. O
Colexio de Xornalistas informará en breve deste novo servizo e das
súas pautas para solicitalo e para usalo.