O Concello de Rianxo saca a licitación unha rede pública de accesos Wi-Fi, aberta e de balde
xoves, 27 de febreiro do 2020
O Concello de Rianxo comezou o ano xerando
iniciativas para ceibar o termo municipal do meirande número de
baleiros de cobertura dixital, o que se veñen chamando en termos
tecnolóxicos e técnicos zonas brancas (onde non hai cobertura nin
visos de habela a curto e medio prazo). Se os días pasados falamos
da súa participación no programa da AMTEGA e a FEGAMP para
posibilitar telecomunicacións móbiles de calidade nos puntos máis
críticos (participación
que incluíu unha enquisa directa coa veciñanza, que puido achegar
as súas suxestións), este xoves 27 o
Concello anunciou que vén de sacar a licitación do subministro de
Internet sen fíos (Wi-Fi) para espazos públicos do Concello.
Será un servizo de balde e aberto para a cidadanía.
O Goberno local explicou tamén que o servizo
contará con máis de dez puntos de acceso e que a rede porá en
xogo, canda menos, un punto de conexión por parroquia nos centros
culturais, en prazas públicas e mesmo algunha das praias coas que
conta o termo municipal, algunhas delas moi concorridas, como Tanxil,
As Cunchas ou O Porrón. A previsión do Concello, que sinalou que
unha vez adxudicado haberá un período de un mes para desenvolver os
traballos, é ter os puntos de acceso cunha vertente máis turística
(as praias por exemplo) operativos para o verán.
O servizo poderá ser despregado a través da
participación do Concello de Rianxo nun programa europeo: foi
seleccionado como beneficiario do proxecto WiFi4EU da Axencia
Executiva de Innovación e Redes (INEA) da Comisión Europea. A
iniciativa WiFi4EU promove o libre acceso da cidadanía a conexións
Wi-Fi abertas e de balde en espazos públicos de municipios de toda
Europa.
As bases
O prego de prescricións técnicas describe as
condicións que rexerán a contratación do subministro do
equipamento necesario para dar cobertura sen fíos ás zonas
seleccionadas e a instalación e posta en funcionamento, así como os
servizos de mantemento do equipamento e das conexións de datos
durante o período de tres anos que contempla o acordo asinado coa
Comisión Europea para facer efectiva a subvención. O Concello tamén
explica que “posto que nesta licitación se inclúen tanto a
instalación dos elementos Wi-Fi como as conexións á Internet, este
último servizo pode ser dado a través de subcontrato ou unión
temporal entre empresas”. A licitación farase por medios
electrónicos na Plataforma
de contratación do sector público.