O Goberno destina case 550.000 euros para transformar tecnoloxicamente o Camiño do Mar de Arousa
xoves, 30 de decembro do 2021
O
delegado
do Goberno en Galicia, José Miñones, presentou este 29 de decembro
o investimento do Goberno para a transformación do Camiño do Mar de
Arousa e Río Ulla nun “destino turístico de referencia,
sustentábel e competitivo”, apoiado en medidas de eficiencia
enerxética e tecnoloxías dixitais. Segundo confirmou Miñones,
acompañado da presidenta da Mancomunidade de Municipios do Salnés,
Marta Giráldez, e a subdelegada do Goberno Maica Larriba, o
investimento en cuestión será de 2.116.000 euros. Deles, case
550.000 reservaranse para iniciativas TIC.
A
achega foi acordada polo Ministerio de Industria, Comercio e Turismo,
dentro do Plan Nacional Turístico, e servirá para financiar o Plan
de Sustentabilidade Turística neste destino que impulsa a
Mancomunidade de Municipios do Salnés.
O
delegado do Goberno felicitou aos promotores e promotoras do proxecto
que servirá “para potenciar este Camiño tan singular que une mar,
tradición e historia, e así situalo nun lugar prioritario na axenda
turística internacional de Galicia e do Xacobeo”.
José
Miñones apuntou que o Goberno de España apoia ao Xacobeo “como
unha oportunidade estratéxica para transformar o noso turismo e o
das nosas vilas e concellos, a medio e longo prazo” e faino a
través de investimentos programados, como o da Mancomunidade do
Salnés.
José
Miñones explicou que a Mancomunidade do Salnés recibirá do
Ministerio de Industria 2.116.000 euros divididos en tres
anualidades, dos que 634.000 euros serán para o próximo ano 2022. O
plan ten catro eixos principais: Transición verde e sustentábel
(458.000 euros para humanizar e mellorar a accesibilidade nas rutas,
a restauración ambiental da contorna e a instalación de puntos de
recarga de bicicletas eléctricas), Mellora da eficiencia
enerxética (430.000 euros para accións de renovación do
alumeado público e instalación de puntos de carga para vehículos
eléctricos), Transición dixital (548.000 euros para
elementos de turismo intelixente e dixital, para un sistema de
contaxe de visitantes e para dotar de rede Wi-Fi a toda a contorna) e
Competitividade (680.000 euros para crear nove miradoiros
orientados ao Camiño do Mar de Arousa e Río Ulla; o financiamento
dun buque escola e o desenvolvemento de “bautismos de mar” para
iniciar aos visitantes na navegación a vela).