O Goberno galego xa repartiu case todos os computadores e conexións de balde para fogares vulnerábeis
xoves, 9 de abril do 2020
A
crise sanitaria derivada da pandemia COVID-19 agrava a fenda dixital,
é dicir, o espazo que separa ás familias e empresas que teñen os
recursos e a cobertura axeitada para vivir plenamente na sociedade
conectada das que non dispoñen nin dos medios nin do servizo das
operadoras. Co fin de mitigar estas situación, as administracións
están a pór en marcha estes días medidas para evitar que a fenda
se agrande e permitir que todas as familias poidan seguir coa
actividade escolar a través da teledocencia. A Xunta atópase entre
estas administracións. Este
9 de abril deu a coñecer que repartiu a práctica totalidade dos
computadores e conexións a Internet que tiña programado distribuír
entre as familias con menos recursos. O subministro de material
desenvolveuse en menos dunha semana.
Foron
uns 1.000 equipos informáticos con cadansúas conexións a Internet
de balde para fogares con estudantes de ESO, Bacharelato e Formación
Profesional. Os poucos computadores que ficaron por fornecer serán
entregados á a volta das vacacións escolares de Semana Santa ante a
petición dos propios centros.
Esta
medida, aprobada no último Consello da Xunta, realízase en
colaboración cos operadores R, Vodafone e Orange. A familias
recibirán os equipos e a conectividade como préstamo persoal para
facilitarlles aos seus fillos o seguimento da actividade educativa,
mentres dure o Estado de Alarma.
A
través dos centros
Os
portátiles lévanse ás familias a través dos centros de ensino,
grazas á colaboración dos equipos directivos, cos que se contacta
para pechar a entrega. Todos os centros públicos que imparten
Educación Secundaria Obrigatoria, Bacharelato ou Formación
Profesional recibiron tres equipos con conectividade, que distribúen
entre as familias atendendo á situación socioeconómica, dando
prioridade ao alumnado dos cursos de final de etapa que titulen (4º
da ESO, 2º de Bacharelato e 2º de FP) e a aquelas familias que non
dispoñan nos fogares de ordenador nin de conexión a Internet.
Triplícase
o uso das plataformas online
A
dotación forma parte do paquete de medidas que puxo en marcha a
Xunta para facilitar o seguimento en liña da actividade educativa.
Entre as últimas actuacións está a posta a disposición dos
docentes a pasada semana dunha plataforma de videoconferencia que
permitiu na primeira semana activa máis de 30.000 reunións
virtuais, nas que participaron máis de 100.000 docentes e alumnos.
Ademais,
desde o 30 de marzo os provedores de contidos da plataforma E-Dixgal:
aulaPlaneta, Edebé, Netex e Pearson, permiten o acceso ao seus
contidos aos centros que non están integrados na iniciativa, unha
medida da que se poden beneficiar ata 95.000 rapaces.
O
Goberno galego tamén lembra que as plataformas coas que xa contaba a
comunidade educativa galega incrementaron o seu uso desde a entrada
en vigor da emerxencia sanitaria en Galicia. Ata o 4 de abril, último
día lectivo, a app abalarMóbil triplicou os usuarios
diarios, e fronte aos 28.000 de media diaria antes da crise, a semana
pasada rexistrou máis de 80.000 usuarios diarios, chegando a máis
de 217.000 o venres”, explican dende a axencia AMTEGA.