O ITG impulsa a revolución tecnolóxica que acelerará a transición enerxética
mércores, 1 de decembro do 2021
O
Instituto Tecnolóxico de Galicia (ITG)
acolleu este 1 de decembro a xornada Comunidades Enerxéticas
Locais, que xirou ao redor de tres cuestións básicas: casos de
éxito en Galicia en materia de produción renovábel intelixente e
transición enerxética, ferramentas de financiamento e desafíos
futuros da tecnoloxía. Segundo se fixo saber no seu transcurso, as
comunidades enerxéticas locais son un elemento “clave” de futuro
xa que favorecen o desenvolvemento da economía do territorio, crean
emprego, fixan poboación, reducen o consumo enerxético e as
emisións e aumentan a independencia enerxética.
A
xornada, impulsada por ITG como centro tecnolóxico nacional de
excelencia Cervera para impulsar a transición enerxética en España,
contou a intervención do vicepresidente económico e conselleiro de
Economía, Empresa e Innovación, Francisco Conde, quen afirmou que
“Galicia busca contribuír ao novo modelo enerxético a través da
cooperación entre cidadanía, pemes e administracións”. Conde
sinalou ademais que “en Galicia os proxectos locais son unha
realidade que se está a materializar aos poucos, cos importantes
recursos intelixentes que achegan centros de coñecemento como o
Instituto Tecnolóxico de Galicia”.
Pola
súa banda, Santiago Rodríguez Charlón, director da división de
Enerxía de ITG, fixo un repaso polos retos futuros da tecnoloxía en
España, sinalando que “o éxito das comunidades enerxéticas pasa
sen dúbida polo avance tecnolóxico e os cambios regulamentarios”.
Rodríguez Charlón apuntou que “o novo paradigma enerxético expón
novas necesidades, como son, entre outras, a creación dun plan para
a interconexión e integración na rede de microplantas de enerxía
renovábel xestionadas por produtores non profesionalizados; ou o
desenvolvemento de novos elementos activos na rede de distribución
que garantan a estabilidade e xestión intelixente en áreas
enerxeticamente bidireccionais”. Tamén destacou outros desafíos
como o impulso de sistemas de xestión para prosumidores
(consumidores que tamén producen) que permitan interoperatibilidade
e a participación nos mercados de enerxía e servizos á rede, baixo
plataformas software que regulen e coordinen a súa participación;
ou mecanismos de control para a alta variabilidade nos fluxos de
potencia, calidade de enerxía, conxestións de capacidade, etc..
Tamén
lembrou que o ITG, a través do seu laboratorio de Smart Grids (redes
eléctricas intelixentes), desenvolve a intelixencia tecnolóxica que
permite ás comunidades enerxéticas locais ser parte activa e
independente no modelo enerxético, “dando o necesario soporte á
decisión de cando é mellor xerar a enerxía de forma local e
renovábel, cando é mellor consumila ou cando é mellor almacenala
ou compartila”.
Na
xornada presentáronse, baixo a moderación de Eduardo Fontúrbel,
xefe de Proxectos de Enerxía en ITG, algúns exemplos de proxectos
locais de éxito que se están a desenvolver en Galicia, en moitos
dos cales o ITG participa como socio tecnolóxico. Así, Miguel
Fontela, director de Enerxía, GreenDeal & Sustainable
Engineering de NTT Data, expuxo o caso da comunidade enerxética que
se creou na estación de montaña de Manzaneda, Smart Grid Manzaneda,
un proxecto innovador no que se implantou un mix de
solucións enerxéticas que combina a xeración de enerxía
fotovoltaica, os sistemas de carga de vehículo eléctrico, baterías
de almacenamento eléctrico, incluída unha batería de segunda vida,
almacenamento térmico mediante sistema de intercambio de fases e un
district heating con biomasa. A contribución de ITG no
proxecto consistiu na asistencia técnica e execución de todo o
sistema de monitoraxe e adquisición de datos das instalacións
técnicas, abranguendo desde o deseño da solución e a instalación
de sistemas hardware de medida e comunicacións até a implantación
da súa plataforma IoT Flythings, que xestiona todos os datos
enerxéticos das instalacións e á súa vez dá servizo a
aplicacións de terceiros.
Eduardo
Blanco, xefe de departamento de Pesca e Xestión de Patrimonio da
Autoridade Portuaria da Coruña, expuxo o proxecto Green Port, baixo
o cal se está a xerar no porto exterior de Langosteira un hub
enerxético para o impulso e o desenvolvemento de recursos renovábeis
locais como son as enerxías eólicas mariñas on-shore e
off-shore, sistemas de almacenamento, xeración fotovoltaica
ou sistemas de produción de hidróxeno verde, todo iso para dar
servizo aos operadores portuarios, buques e industria local. ITG
participou no deseño da nova infraestrutura eléctrica requirida, no
dimensionamento dos activos enerxéticos e na definición do sistema
de xestión intelixente que permita a supervisión, operación e
control intelixente dos fluxos enerxéticos e parámetros de
operación da microrrede do porto.
Raquel
Gallardo, xerente de Servizos Enerxéticos de Repsol/Ekiluz, comentou
os diferentes modelos de negocio que ofrece a súa compañía de face
a promover comunidades enerxéticas. Ekiluz é un novo modelo de
xestión distribuída e renovábel que fomenta a participación
cidadá a través de cooperativas enerxéticas sen ánimo de lucro,
achegando para iso a súa experiencia e daquelas ferramentas
necesarias para a posta en marcha destes proxectos en colaboración
coa administración local e autonómica, nos que a partir da
construción de plantas solares fotovoltaicas no chan, ao redor de
400-500 cooperativistas obteñen un aforro directo na súa factura
eléctrica.