O ITG incrementará o seu persoal con 5 novas incorporacións no primeiro semestre de 2021
luns, 19 de abril do 2021
O
centro tecnolóxico ITG (Instituto Tecnolóxico de Galicia) vén de
anunciar un incremento do seu persoal durante o primeiro semestre de
2021. Farao a través de cinco novos procesos de selección que poden
ser consultados na súa web e redes
sociais. O novo persoal integrarase nos equipos de traballo
multidisciplinares que están a desenvolver solucións específicas
para a industria e en investigacións a nivel europeo nas que o
centro ten, segundo indica, “un alto nivel de participación”.
Para
entrar a formar parte do equipo que traballa no deseño e xestión de
redes eléctricas intelixentes, ITG busca especialistas en redes
eléctricas intelixentes (smart grids) “cun amplo
coñecemento do mercado eléctrico e de procedementos de operación e
normativa”.
Así
mesmo, coa misión de participar nas solucións de mercado que
desenvolve o centro neste ámbito, seleccionará profesionais en
eficiencia enerxética con experiencia en transferencia de I+D ao
mercado.
Amais,
para liderar o lanzamento a mercados internacionais da súa
plataforma DroneSuite, orientada a facilitar a actividade diaria das
empresas operadoras de drons, ITG busca “unha persoa responsábel
do desenvolvemento de negocio con ampla experiencia”. A meta é
crear unha solución tecnolóxica que “anticipa o inminente
escenario de alta densidade de voos que habilitará o novo
regulamento europeo”.
ITG
selecciona tamén especialistas en proxectos europeos para coordinar
a participación da entidade en programas nacionais e europeos de
I+D+i nos eidos da Industria 4.0, os drons do futuro, o medio
ambiente e as cidades sustentábeis.
Por
último, para o desenvolvemento e mantemento de diferentes soluciones
web, ITG busca persoas especializadas en programación full
stack, como se coñece este perfil no sector
informático, para desenvolver a estratexia axeitada para cada parte
do proceso de desenvolvemento web.
Todas
as ofertas de emprego pódense consultar na web do ITG.