O #LAIC móstranos este mes como darlle a volta ás mensaxes de odio na Rede
luns, 17 de febreiro do 2020
O
laboratorio
coruñés #LAIC vai adicar este mes de febreiro ás posibilidades das
narrativas innovadoras para avanzar en utilidade social e combater o
discurso de odio na Rede, mensaxes discriminatorias ou novas
falsas. “En definitiva, tentaranse fomentar este mes estratexias e
ferramentas que nos axuden a crear unha paisaxe de maior respecto en
Internet”, explican dende Coruña Dixital, responsábel do
laboratorio, que vén en febreiro cunha sesión “formativa e moi
práctica”, da man da Fundación porCausa, conformada por
importantes profesionais da comunicación.
A
actividade, prevista para este 28 de febreiro, está dirixida a
calquera persoa con interese en loitar contra os discursos negativos
e de odio ligados aos éxodos humanos e, dun modo especial, “para a
xente do xornalismo, da comunicación e para quen estea involucrada
profesionalmente ou como activista en temas de migración”.
Baixo
o nome de #Migratón, o plan da activade inclúe o fornecemento de
ferramentas para darmos unha viraxe ao relato negativo, “traballando
desde o creativo e xerando novos marcos narrativos”. A inscrición
nesta actividade (venres 28 de febreiro, 16:00-20:00) está
aberta e xa podemos achegar os nosos datos online.
O
#Migratón súmase ao Laboratorio de Ciberactivismo e Innovación
Narrativa contra o discurso de odio na Rede, que a ONG coruñesa Ecos
do Sur desenvolve, a través das profesionais do seu programa
Ciberespect, todos os martes deste mes no centro Ágora.