O Museo da Catedral de Santiago entra na segunda fase do proceso de dixitalización dos seus tesouros
xoves, 2 de abril do 2020
O
Museo da Catedral
de Santiago continúa a traballar nun ambicioso proxecto que
ampliará o coñecemento que temos do rico patrimonio que acubilla,
ao tempo que contribuirá a poñer a Santiago no mundo e axudará á
preservación das importantes riquezas do templo compostelán.
Estamos a falar do proceso de dixitalización das pezas artísticas
do Museo, que comezou hai uns meses (tal
e como fixemos saber en novembro dende Código Cero) e que vén
de entrar nunha segunda fase, completándose as modelaxes
tridimensionais e catalogando o material resultante antes do seu
envorcado na Rede.
Trátase
dun traballo desenvolvido pola Fundación Catedral de Santiago,
enmarcado no proxecto O Teu Xacobeo, que promove
a Xunta de Galicia.
Nestes
momentos, segundo informou o Museo, o proceso “entra nunha segunda
fase”, unha vez que xa se dixitalizaron varios relicarios e os
sepulcros do Panteón Real. Tamén se traballou con esculturas
situadas noutros ámbitos da basílica, como as esculturas situadas
no exterior da Porta Santa. Un
avance dos resultados pode verse xa en Vimeo, nun vídeo explicativo
e divulgativo.
En
total fotografáronse e escaneáronse 75 elementos, o que permitirá,
segundo informaron fontes do Museo, “crear unha base de datos
documental, de gran importancia para a conservación e a difusión do
patrimonio xacobeo da Catedral”.
Todo
este material quedará a disposición do público nunha web na que se
poderá navegar por diferentes apartados: a Catedral Románica, o
Mestre Mateo, o espazo sacro do Tesouro-Capela de Reliquias, o
Panteón Real, etc.
Ademais,
habilitaranse dispositivos físicos no percorrido de visita ao espazo
expositivo, para “poder visualizar os modelos tridimensionais
dalgunhas destas pezas”.
Desde
o Museo da Catedral sinálase que “se se segue a traballar durante
esta tempada de crise sanitaria en que o Museo debe ficar pechado ao
público, poñendo o foco nestes ámbitos da investigación,
conservación e difusión das súas coleccións”. Porén, malia
adversidade derivada da pandemia, lembran que a tecnoloxía abre
“importantes eidos de comunicación con visitantes virtuais, que
poden acceder a distintos materiais e información sobre as
coleccións e actividades do Museo”.