O Parlamento Europeo desconfía de Kaspersky Labs

A compañía de seguridade informática Kaspersky Labs está no punto de mira de distintos gobernos ante o temor de que que o uso do seu software poida ser un risco difícil de asumir ante a posible influencia do goberno ruso na empresa, de xeito que nos EE.UU. xa prohibiron o uso das súas aplicacións nas axencias gobernamentais, no Reino Unido tamén advertiron sobre os riscos de confiar en Kaspersky e finalmente tamén chegou a polémica ao Parlamento Europeo, que aprobou unha moción para pedir á Unión Europea a revisión exhaustiva dos programas, os equipos e as infraestruturas informáticas e de comunicacións que se empregan nas institucións para excluír programas potencialmente perigosos e «prohibir aqueles que fosen confirmados como malintencionados, como os de Kaspersky Lab».
Aínda que a petición do Parlamento Europeo non obriga a ningún país a adoptar medidas, deixa a Kaspersky nunha moi mala situación, polo que publicou un comunicado rexeitando todas as acusacións na súa contra, asegurando que as decisións do Parlamento baseáronse en falsidades e considerando insultante que se ataque así a unha compañía que loita contra os delitos informáticos.
Así, Kaspersky Lab anuncia que cesará temporalmente as súas colaboracións coas iniciativas europeas de loita contra a delincuencia informática, incluíndo ás da Europol, até que o Parlamento Europeo clarexe a actual situación, aínda que esta reacción parece simplemente simbólica, xa que semella improbable que unha autoridade comunitaria fose a solicitar a colaboración dunha compañía da que desconfíase publicamente.