O novo Call of Duty estará no Game Pass dende o seu lanzamento

Tras a compra de Activision Blizzard por parte de Microsoft era toda unha incógnita o que farían coa saga Call of Duty e o seu servizo de xogo mediante subscrición, o Game Pass, e finalmente confirman que Call of Duty: Black Ops 6 formará parte do Game Pass dende o primeiro día, o que será un dos grandes reclamos para a contratación deste servizo.
En calquera caso, Microsoft non dá detalles sobre o novo xogo, e remite aos interesados neste título ao Xbox Games Showcase do vindeiro 9 de xuño, cando afondarán na nova entrega da franquía de acción en primeira persoa que chegará a consolas e ordenadores no outono.