O novo seminario Co(m)xénero mostrará distintas maneiras de ceibar os videoxogos do machismo
xoves, 14 de novembro do 2019
Este
mes de novembro toca poñer sobre a mesa a cuestión dos videoxogos
dende unha óptica feminista e libre de estereotipos e ideas
preconcibidas. Este será un dos obxectivos básicos da nova
convocatoria de
Co(m)xénero, o Seminario Permanente de Comunicación e Xénero da
Universidade de Santiago, que volve, en palabras das
organizadoras, “para dar voz ás mulleres que fan dos videoxogos a
súa paixón e a súa profesión”. Participarán xogadoras,
comunicadoras, desenvolvedoras, pioneiras galegas, docentes,
programadoras, artistas e divulgadoras. A cita será os días 18 e 19
deste mes, na Facultade de Ciencias da Comunicación, xuntando forzas
para “repensar as formas nas que o sexismo persiste no sector”.
A
asistencia ás xornadas é de balde previa inscrición na
web do Grupo de Estudos Audiovisuais da USC, organizador do
seminario en conxunto coa Oficina de Igualdade de Xénero da
universidade. O prazo remata este venres 15 de novembro.
Participan
como relatoras neste terceiro seminario Co(m)xénero as seguintes
expertas e profesionais das novas tecnoloxías e as novas formas de
comunicación: Nieves R. Brisaboa, catedrática de Linguaxes e
Sistemas Informáticos da Universidade da Coruña e Premio Nacional
de Informática 2019; e Dhaunae De Vir, desenvolvedora de negocio
transmedia en Paradox Interactive, empresa responsábel de
éxitos como o Europa Universalis, o Crusader Kings ou
os populares xogos de vampiros e lobishomes ambientados no World
of Darkness (Mundo das Tebras).
Xunto
a Nieves e Dhaunae compartirán experiencias e puntos de vista María
Fernández Hermida, creadora e iluminadora de escenarios virtuais
para videoxogos e embaixadora da asociación internacional Women in
Games; e Marina Amores, comunicadora audiovisual especializada en
videoxogos e xénero e coordinadora de Protesto! (AnaitGames,
2018), o primeiro libro en castelán que aborda os videoxogos cunha
perspectiva feminista.
Máis
actividades
O
programa compleméntase con sesións de proxeccións e debates ao
redor de “pezas audiovisuais que pescudan as formas nas que o
sexismo se manifesta dentro e fóra dos xogos” amais de obradoiros
cos que “desbotar estereotipos e aprender a facer videoxogos para
todas e para todos”.
Luz
Castro, profesora especializada en creación dixital da Universidade
da Coruña e co-fundadora da empresa Imaxin Software; Beatriz
Legerén, docente especializada en deseño e creación de videoxogos
na UVigo e Olaia Ferrando, investigadora, deseñadora UI/UX e
ilustradora, serán as encargadas de impartir as devanditas sesións.
Xogamos
todas
Os
eSports ou deportes electrónicos serán a temática estrela o
martes 19 de novembro. Ao abeiro desta xornada, xogadoras galegas
reunidas para a ocasión medirán as súas forzas con outro equipo
competitivo español nun pequeno torneo de exhibición de Overwatch
que se celebrará no auditorio da Facultade. A organización do
seminario salienta que este torneo terá o aliciente de “ser a
primeira partida de deportes en liña retransmitida e narrada en
lingua galega”.
Os
comentaristas serán Javier Martínez Vidal, máis coñecido como
Gamer Vidal, e Minia Samku Monteagudo, ambos
integrantes de Titan Media, empresa responsábel directa da
retransmisión das competicións de Overwatch en español.
A
quen vai dirixido
Coordinado
pola directora do Grupo de Estudos Audiovisuais, a catedrática
Margarita Ledo Andión, e a docente e investigadora da USC, Marta
Pérez Pereiro, o seminario está dirixido a estudantes de
comunicación, investigadoras e investigadores en formación,
profesionais e, en xeral, “a todas as persoas interesadas en
abordar os medios e as industrias culturais e creativas dende unha
lectura crítica”. Pola súa relevancia como acción docente
innovadora, o Co(m)xénero foi distinguido este ano nos X Premios á
Introdución da Perspectiva de Xénero da a USC.