Os editores de xornais loitan polos seus dereitos de propiedade intelectual tamén na Rede
venres, 5 de xuño do 2009
Logo de que un xulgado do mercantil de
Madrid lle dera a razón aos editores de diarios, prohibíndolle a unha empresa
de resumes de prensa distribuir contidos de xornais sen contar antes coa súa
aprobación, a Asociación de Editores de Diarios Españois (AEDE) vén de anunciar
que “estarán dispostos a defender os seus
dereitos de propiedade intelectual tamén en Internet, facéndoos
valer ante os agregadores de novas como Google News”.
A sentenza emitida polo devandito xulgado
recoñece como titulares dos dereitos de propiedade intelectual dos diarios,
tanto impresos como na Rede, aos seus editores, polo que estes estiman que a
resolución “pode ser trasladada aos
agregadores de novas en liña” xa que, segundo apuntaba o portavoz da
Asociación Europea de Editores de Periódicos (ENPA), sen os contidos editoriais
procedentes da prensa,”estes nin sequera
existirían”.
A Asociación de Editores de Diarios
Españois (AEDE), pola súa parte, considera o fallo xudicial como un punto de
partida na defensa dos seus intereses lexítimos de propiedade intelectual, e avogan
por “chegar cos agregadores de novas en liña
a acordos similares aos que acadaron coas empresas de press-clipping”.
Esta práctica, que non é máis a acción de
agregar contidos, só se poderá levar cabo, segundo informou o socio director do
despacho de avogados Cremades & Calvo-Sotelo (que levou o caso), “baixo autorización dos titulares da
información”.
Pola súa parte, o director xeral da AEDE,
Ignacio M. Benito, quen considera que o respeto dos dereitos de propiedade
intelectual dos editores “é abolutamente
básico para poder seguir ofrecendo información xornalística de calidade”,
mostrou a súa satisfacción pola condea a Google News “por violar os dereitos de propiedade intelectual de varios diarios
belgas” xa que, segundo afirma, “quedou
probado que máis que un motor de búsqueda é un portal de novas, que extrae
contidos das novas de prensa”.