Os novos Surface chegarán a España o 7 de febreiro

xoves, 3 de xaneiro do 2019 Marcus Fernández

A tenda en liña de Microsoft para España vén de introducir 3 novos produtos en reserva, ou sexa, que en breve poderemos mercalos oficialmente no noso territorio, de xeito que temos máis preto a chegada das novas xeracións dos equipos Surface Laptop 2 e Surface Pro 6 e, finalmente, a chegada do Surface Studio 2, ordenador todo-en-un para o escritorio, orientado á creatividade, e que na súa primeira xeración non chegou a comercializarse en España.
Estes novos equipos anunciáranse hai 3 meses, destacando o Surface Pro 6 e o Surface Laptop 2 basicamente pola integración de procesadores Intel de 8ª xeración, o que supón melloras de velocidade, mentres que o Surface Studio 2 mellora o rendemento un 50%, o brillo da súa pantalla un 38% e o seu contraste un 22%, de xeito que temos un equipo máis sólido para os creativos que opten por este tipo de ordenador que permite abater a súa pantalla para convertese nunha mesa de debuxo, polo que sería unha sorte de convertible que, en vez de ter formato portátil, temos no noso escritorio (contando así cun lenzo de traballo de grande tamaño (28 polgadas).
A data prevista de envío destes equipos que xa poden reservarse é o 7 de febreiro.

PUBLICIDADE