Pont-Up Store afonda este venres nas aplicacións da tecnoloxía VR na construción
venres, 18 de setembro do 2020
Comezou
este xoves 17 a feira de
emprendemento pontevedresa Pont-Up Store, unha das grandes
palestras do talento galego aplicado a proxectos empresariais
innovadores, desta volta marcada pola COVID e pola imposibilidade de
levar a cabo actividades que impliquen algún tipo de risco para
asistentes e cidadanía en xeral (por exemplo a habitual carpa de
proxectos da praza de España). Con todo, a organización (o Campus
de Pontevedra e o Concello) fixo todo o posíbel para garantir a
continuidade, poñendo o foco na súa vertente máis divulgativa,
explicativa e ilustrativa. Este venres tocaranse temas como a
tecnoloxía VR no sector da construción.
Este
será o asunto da primeira das sesión que o Pont-Up adica hoxe a
estas tecnoloxías ao abeiro do seu Espazo Gaming, entre as 17:00 -
17:30. Baixo o título Profesionais da animación, necesitámosvos
no mundo da construción, Iván Gómez, CEO da empresa VT-Lab
desenvolverá unha presentación para amosar todas as posibilidades
deste eido de actividade.
A
continuación, entre as 17:35 - 18:05, Xoel Vázquez, CEO da empresa
Xoia Software, será o encargado do relatorio A realidade virtual
e aumentada máis alá dos xogos e o lecer.
Por
último, entre as 18:10 e as 18:40, Javier Davila Couto, CEO da
emprensa KENDRA falará do Lecer desde un novo prisma. Uso de
tecnoloxías de RV/ RA. As
tres actividades poden seguirse a través das ligazóns que figuran
dentro do programa da web do evento.
O
Pont-Up Store completará a xornada deste venres con un meetup
formativo organizado polo grupo Wordpress Pontevedra, destinado a
axudar a emprendedoras e emprendedores a enfrontarse á actual
situación de incertidume e de cambios empresariais bruscos,
emprendendo procesos de dixitalización coa axuda de persoas expertas
no mundo da mercadotecnia, a comunicación e o emprendemento. Será
en aberto entre as 19:00 e as 21:00, a través da canle de Youtube de
Wordpress Pontevedra, ou accedendo desde a web do encontro.
O
relatorio Leva o teu negocio ao seguinte nivel co marketing
dixital é a proposta formativa que ofrecerá R este venres de
10:00 a 11:30 dentro do Espazo de Desenvolvemento de Competencias e
Economía Social, destinada a que as persoas emprendedoras coñezan
os fundamentos da mercadotecnia dixital para mellorar a presenza e a
visualización en liña do seu proxecto de negocio co obxectivo de
atraer clientes e aumentar as súas ventas. A sesión repetirase o
sábado no mesmo horario. As inscricións realizaranse a través da
web do encontro.
Construíndo
pontes! Como crear redes internacionais
Baixo
este título, e dentro do Espazo de Internacionalización, a entidade
Ticket2Europe desenvolverá unha actividade centrada en axudar ás
persoas emprendedoras a comprender que, para construír os seus
proxectos, é de vital importancia aprender do que sucede máis alá
do seu entorno. Participará Pilar del Oro, do Programa Europeo
LIDERA; Belén Mendoza, responsábel do Programa Erasmus para Novos
Emprendedores; e presentaranse as experiencias innovadoras de
colaboración de Via Láctea; Dinamo 10 e Creative Habitat; e Sports
for the world. O encontro estará moderado por África Rodríguez de
Espacio Arroelo.