Portos acada aforros destacados de enerxía grazas ao uso de equipamentos intelixentes

A Consellería do Mar, a través de Portos de Galicia, acadou un aforro enerxético de ata o 70% nas instalacións de bombeo de augas residuais de sete dársenas pontevedresas grazas a un proxecto de monitoraxe e seguimento telemático do seu funcionamento. Así o destacou este xoves 8 a presidenta do ente público, Susana Lenguas, nunha visita a Bueu, un dos portos nos que se está a desenvolver esta acción piloto xunto cos da Guarda, Baiona, Cangas, Tragove, Vilanova de Arousa e O Xufre.
Susana Lenguas explicou que este servizo inclúe a instalación de sistemas de control telemático as 24 horas que velan polo correcto funcionamento dos bombeos e favorecen “a mellora da calidade ambiental da augas das dársenas”, dixo, engadindo que a implantación requiriu instalación previa de equipamentos de monitoraxe remota formados por router con tarxeta SIM e antena por cada estación, servizo de comunicacións por SMS e correo electrónico e visualización de datos na nube.
“Ese seguimento continuo dos bombeos”, engadiu, “permite detectar en tempo real as posíbeis incidencias”.
No mesmo momento en que a empresa que presta o servizo recibe o aviso de calquera incidente, comunícao a Portos de Galicia e inicia xa a reparación de urxencia no caso de que sexa necesaria minimizando así o tempo de resposta e as consecuencias da avaría. Para poder contar con este servizo executáronse distintas intervencións estruturais dos sistemas de bombeo controlados que permiten un aforro enerxético do 70% e unha estimación do aforro en intervencións de medios humanos do 80% permitindo unha mellora substancial na eficiencia de funcionamento destes equipamentos.
O novo servizo posto en marcha nestes peiraos da Zona Sur de Portos de Galicia pretende dar resposta ás necesidades xurdidas e á experiencia acumulada nos últimos anos trala realización de distintas intervencións para o correcto funcionamento do sistema de bombeos que supuxeron un gasto de máis de 100.000 euros en reparacións só nos últimos cinco anos.
Este sistema está a funcionar no porto de Tragove para as augas residuais industriais da nave de almacén e da lonxa, en Bueu e Cangas para as augas residuais industriais da lonxa, en Baiona para as augas residuais domésticas da estación marítima, na Guarda para as augas residuais domésticas da nave de redes e no Xufre, na Illa de Arousa, para as augas residuais industriais do conxunto do porto.