Preparan na India un tablet de baixo custo para estudantes

venres, 23 de xullo do 2010 Marcus Fernández

Por raro que pareza, a actualidade tecnolóxica internacional estivo centrada durante a xornada de hoxe na India, onde o ministro Kapil Sibal deu a coñecer un ordenador tipo tablet que foi deseñado para o seu uso por parte de estudantes e que terá un prezo de 1.500 rupias (24,73 euros) engadindo que «se máis compañías deciden fabricar dispositivos semellantes, os prezos baixarán automaticamente».
Polo que parece, o dispositivo sería un terminal táctil con 2 Gb de memoria, Wi-Fi, porto USB e cunha alimentación de 2 vatios (pensada para zonas cun subministro eléctrico deficiente) que agardan que poidan gozar os estudantes da India en 2011. O trebello sería capaz de ler documentos en formato PDF e incluso de reproducir vídeos de YouTube, sen detallarse nin o seu hardware nin o seu software (aínda que parece empregar Android ou un S.O. semellante).
O prezo final deste tablet dependería en boa media dos custos de transporte, e o Goberno da India subvencionará o dispositivo para que poidan manter un prezo axustado, aínda que o feito de que Sibal fale da posibilidade de que o tablet aínda poida reducir bastante máis o seu prezo lembra bastante ás afirmacións de Nicholas Negroponte ao anunciar o proxecto OLPC, que finalmente quedou moi lonxe dos seus obxectivos.
O feito de que algúns medios estean a chamar a este produto «o iPad da India» tampouco parece contribuír a dar credibilidade a este proxecto (de feito, a BBC corrixiu o seu titular inicial no que falaban dun «prototipo de iPad de 35 dólares» a «prototipo de ordenador táctil de 35 dólares»), pois resulta evidente que estamos ante un dispositivo de capacidades bastante limitadas orientadas a un país en vías de desenvolvemento, de xeito que non busca competir con produtos de alta gama do mercado occidental.


Vídeo no que podemos ver a presentación do prototipo de tablet destinado para os estudantes da India

PUBLICIDADE