Primux Tech presenta un computador táctil all-in-one
mércores, 20 de setembro do 2017
Primux
Tech, fabricante de electrónica con
sede na Tecnópole de Ourense, vén de presentar o seu primeiro computador táctil todo-en-un. O miolo do trebello, que está a piques de saír ao mercado cun
prezo final de 299 euros,
foi concibido no centro de Investigación e Desenvolvemento que a
empresa ten no Parque Tecnolóxico de Galicia, a Tecnópole de
Ourense.
Segundo
explica Primux, os computadores todo-en-un son equipos de
sobremesa que
teñen integrada na carcasa da súa pantalla a integridade de
circuítos que lle achegan operatividade. Isto en que se traduce a
nivel funcional? Pois en ordenadores con pantalla, teclado e rato,
xuntos e non
separados, o que
redunda nunha meirande comodidade á hora de carrexar o equipo dun
recanto a outro da casa ou da oficia.
Segundo
sinala Primux nun plano máis detallado, o
modelo é “o primeiro deseñado en España que permite converter o
ordenador nunha tableta
cun simple xiro de man”, amais de
contar cunha
batería que permite usalo sen conexión eléctrica, dotada dunha
autonomía de entre seis e sete horas en modo de reprodución de
vídeos.
No
que se refire ao plano tecnolóxico interno, a
empresa galega suma de novo para este proxecto o apoio de dous
xigantes do sector: Intel e Microsoft. Segundo
explica Daniel Rodríguez, director executivo de Primux, o equipo
«integra
unha pantalla de 17,3 polgadas con gran resolución gráfica e
soporta a instalación de discos duros sólidos de gran capacidade»,
que salienta
tamén o deseño ultralixeiro e a resistencia dos materiais de
fabricación.