Primux anuncia “o primeiro notebook deseñado en España”

Chega ao ámbito estatal o que sería, en palabras da empresa desenvolvedora, o primeiro computador portátil ultralixeiro do mercado español. Detrás desta novidade, o Notebook 1401, atópase a compañía galega Primux, emprazada na Tecnópole de Ourense, que deu forma a este novo produto dende o seu centro propio de Investigación e Desenvolvemento situado nas ditas instalacións do Parque Tecnolóxico de Galicia. “Está principalmente enfocado a uso educativo e doméstico e supón un antes e un despois no campo da tecnoloxía en España porque é o primeiro notebook desenvolvido enteiramente aquí”, explica Daniel Rodríguez, director executivo de Primux.
A empresa galega contou coa axuda de Intel e Microsoft. “Trátase dun computador portátil que achega unha fluidez de uso e navegación excepcional grazas a un procesador a 1,84Ghz que se completa con 2GB de memoria RAM”, detalla Rodríguez.
Asemade, hai que salientar o seu deseño ultradelgado (20,2 milímetros de grosor) e un peso aproximado de tan só 1.569 gramos, grazas a que incorpora unha pantalla HD de 14,1 polgadas.
En canto á conectividade e a capacidade de almacenamento, dicir que conta cun porto USB 2.0, conexión Wi-Fi e Bluetooth e un porto Mini HDMI para conectar televisores, cámaras fotográficas ou de vídeo. Os seus 32 GB de almacenamento interno pódense ampliar cunha tarxeta microSD até chegar aos 128 GB, polo que non require un disco duro externo para amorear arquivos pesados. Amais, a súa batería de 10.000 mAh asegura unha autonomía de entre 6 e 8 horas sen necesidade de carga, para as longas xornadas de traballo ou lecer.
O Notebook trae cargados o paquete Office e o novo Windows 10, o último sistema operativo de Microsoft. “Este sistema resulta moito máis accesible e intuitivo que os seus antecesores, recupera o coñecido botón de inicio e permite abrir varias áreas de traballo con diferentes aplicacións para traballar en multitarefa de maneira máis rápida e eficiente”, segundo o director executivo de Primux.
O prezo deste computador é de 269 euros, dende agora está aberta a reserva de unidades a través da tenda en liña, á espera da súa posta á venda tamén en distribuidores oficiais nos vindeiros días.