R leva a súa fibra ultrarrápida a 1.600 fogares e empresas de Cariño

A operadora galega R continúa este 2020 co seu fornecemento de redes ultrarrápidas (redes de Internet a través de fibra óptica) para os nosos concellos. Con estes inicios de ano, o novo servizo de FTTH (Fiber To The Home) da compañía de cable deu un paso relevante no termo municipal de Cariño, na Coruña.
O subministro desta infraestrutura implicará a dispoñibilidade de accesos de nova xeración (con servizos avanzados de teléfono, Internet de alta velocidade con 500 Mbps simétricos e televisión dixital multicanle de R) para 1.600 fogares e empresas do municipio.
Os traballos de acondicionamento urbano e subministro de cable, novamente, tentaron tirar o máximo proveito das infraestruturas municipais previamente existentes no concello coruñés, segundo informa R, engadindo que a achega de fibra no devandito municipio abéiranse ao Plan PEBA-Avanza do Ministerio de Economía e Empresa, do que R foi adxudicataria en 2016 para despregar FTTH (fibra até o edificio) nas chamadas “zonas brancas”, é dicir, as que nunca dispuxeran de accesos de alta velocidade até este momento.
Ademais doutros despregues xa realizados na provincia da Coruña (Abegondo, Cerceda, Muros, Camariñas, Curtis, Ortigueira ou Porto do Son), R tamén despregou fibra no marco deste programa en Pontevedra, onde chegou ás localidades de Cuntis, Combarro, Meaño, O Rosal, Pontecaldelas, Ribadumia e Tomiño.
A maiores R tamén está a levar redes de nova xeración ás provincias de Ourense (Petín e Pobra de Trives) e máis de Lugo (Monterroso, Lourenzá, Palas de Rei ou Barreiros).
En total, todos estes traballos supoñen un investimento de preto de 8 millóns de euros, dos que 4,3 son subvencionados polos fondos FEDER da Unión Europea, a través do Programa de Extensión da Banda Larga de Nova Xeración (PEBA-Plan Avanza) do Ministerio de Economía e Empresa. Nas provincias de Lugo e Ourense o investimento total supera os 785.000 euros, dos cales máis de 430.000 proceden dos fondos europeos.