R mantén o patrocinio do equipo Celta Integra
martes, 14 de marzo do 2023
O director da
Fundación Celta, Germán Arteta e o director de R, Alfredo Ramos, posaron esta
mañá xunto a membros do equipo e do corpo técnico do conxunto Celta Integra no
Salón Rexio da sede do R.C.Celta en Vigo, para pór en escena o novo acordo de
patrocinio rubricado polo operador galego e a entidade olívica. Así, R volve
patrocinar oficialmente o Celta Integra, que xoga en LaLiga Genuine,
competición de equipos formados por persoas do colectivo con discapacidade
intelectual e organizada por LaLiga.
Arteta expresou
na xuntanza o seu agradecemento a R pola súa “xenerosidade e apoio ao equipo
Fundación Celta Integra. Esta colaboración axúdanos ano tras ano a mellorar as
oportunidades do noso equipo e a súa calidade de vida, contribuíndo ao seu
crecemento, progreso e mellora, ademais de ampliar a formación dos seus
integrantes da man do fútbol, utilizando este deporte como ferramenta
transversal para transmisión de valores. Asociarnos con R permítenos obter unha maior difusión e visibilidade do
proxecto, algo fundamental á hora de seguir captando novos aliados. Podemos
dicir que Celta Integra xa non só é un proxecto da Fundación senón que se
transformou nunha realidade froito de todos quen nos axudan a seguir crecendo”.
Alfredo Ramos
explicou que para R colaborar co Celta Integra “é unha das accións que nos fai
sentir máis orgullo e satisfai como empresa, porque cremos que de verdade
estamos contribuíndo, aínda que só sexa un pouco, á construción dunha sociedade
máis solidaria e xusta”.
R, co equipo nos partidos
O operador R xa é
patrocinador oficial do Celta Integra até o final da presente tempada 2022-23
de LaLiga Genuine: o logo de R estará presente no equipamento deportivo dos
xogadores e do corpo técnico e figurará igualmente na web do equipo Celta
Integra. Ademais, os xogadores do club vigués disputarán un partido amigable contra
profesionais de R, entre outras accións incluídas no acordo.
Con este
patrocinio, a Fundación Celta de Vigo e R poñen en común o interese de ambas as
entidades por contribuír á mellora constante, o crecemento e a adaptación
social do equipo e das persoas que o conforman. Do mesmo xeito, o operador
galego mantén vixente neste acompañamento ao conxunto Celta Integra a súa
inquietude pola colaboración social para contribuír á mellora de vida dos/das
habitantes de Galicia a todos os niveis.