Realme lanza un par de móbiles e unha tableta

venres, 13 de maio do 2022 Marcus Fernández

Esta semana Realme presentou varios dispositivos chamados a ser supervendas nos vindeiros meses, ocupando un lugar destacado no seu catálogo pola súa boa relación entre especificacións e prezo, e por adaptarse bastante ben á demanda actual do mercado, un dos elementos que provocou que esta marca fose a de maior crecemento en España no primeiro trimestre do ano.
Un dos móbiles que promete vender moi ben nos vindeiros meses é o Realme 9 5G, equipado cun procesador Qualcomm Snapdragon 695 5G, 4GB de RAM, 64/128 GB de almacenamento, pantalla Full HD+ de 6,6 polgadas cunha velocidade de refresco de 120 Hz, cámara traseira tripla cun sensor principal de 50 Mpíxeles, cámara frontal de 16 Mpíxeles, lector de impresións dixitais lateral, lector de tarxetas microSD, conector para auriculares, batería de 5.000 mAh con carga rápida de 18 watts e un prezo que parte dos 279,99 euros, polo que pode axustarse a moitos usuarios que buscan un móbil preparado para a 5G sen realizar un grande investimento.

Vídeo promocional do Realme 9 5G

Para usuarios máis esixentes, pero que poidan prescindir da 5G, teríamos o Realme 9, que mantería a mesma estética, pero cunha configuración bastante diferente, xa que se conforma cun procesador Qualcomm Snapdragon 680 e pantalla Super AMOLED de 6,5 polgadas cunha velocidade de refresco de 90 Hz, detalles que permítenlle equilibrar un terminal que destaca por noutros apartados, como serían os seus 6 GB de RAM, a súa cámara traseira tripla cun sensor principal de 108 Mpíxeles e a súa batería de 5.000 mAh con carga rápida de 33 watts. O seu prezo de partida oficial é de 299,99 euros.

Vídeo promocional do Realme 9

Pero a grande sorpresa entre os novos produtos de Realme é, sen dúbida, a tableta Realme Pad Mini, que chega cunha pantalla de 8,7 polgadas, procesador Unisoc T616, 64 GB de almacenamento interno (ampliable mediante tarxetas de até 1 TB), cámara traseira de 8 Mpíxeles, cámara frontal de 5 Mpíxeles, batería de 6.400 mAh con carga rápida de 18 watts, un grosor de 7,59 milímetros e 372 gramos de peso, combinación que sumada aos 179,99 euros do seu prezo oficial (que no seu lanzamento contou cun desconto de 20 euros) pode converter a este produto nun dos grandes éxitos de Realme de cara ao verán, xa que as tabletas de pequeno tamaño teñen o seu público, e poucos están dispostos a pagar os 549 euros que custa o iPad mini de 64 GB.

Vídeo promocional do Realme Pad Mini

PUBLICIDADE