Red.es destina 115,5 millóns de euros para bolsas de formación en intelixencia artificial

O Ministerio para a Transformación Dixital e da Función Pública e o Ministerio de Ciencia, Innovación e Universidades, a través da Secretaría de Estado de Dixitalización e da Función Pública e a Secretaría de Estado de Ciencia, Innovación e Universidades respectivamente, celebraron a primeira reunión de traballo coas catro entidades seleccionadas para desenvolver os programas de atracción e retención do talento. Trátase dunha das medidas do Plan Nacional de Capacidades Dixitais.
O proxecto forma parte da Estratexia de Intelixencia Artificial aprobada o pasado 14 de maio polo Consello de Ministros, no que un dos eixos fundamentais é a formación en IA. O importe destinado a estes programas é de 115,5 millóns de euros e teñen como obxectivo garantir a formación e inclusión dixital da cidadanía e os traballadores.
O encontro celebrouse na sede de Red.es, quen canaliza o investimento e o seguimento do proxecto.
As catro entidades que resultaron beneficiarias da invitación, publicada o pasado 9 de abril, son: a axencia estatal do Consello Superior de Investigacións Científicas (tipoloxía A), o Barcelona Supercomputing Center- Centro Nacional de Supercomputación (BSC-CNS) (tipoloxía A), o Centro Nacional de Investigacións Cardiovasculares Carlos III (F.S.P) (tipoloxía B) e a Fundación Sector Público Estatal Centro Nacional de Investigacións Oncolóxicas Carlos III (tipoloxía B).
Os programas de atracción e retención de talento estarán estruturados en proxectos ou liñas de investigación e deberán incluír a contratación de persoal investigador técnico, predoutoral ou postdoutoral, así como o persoal técnico de apoio vinculado. Cada un destes contratos ou bolsas, un total de 374 terá que cumprir un plan de formación de, polo menos, 240 créditos ECTS, que se desenvolverán durante 48 meses.
Os proxectos ou bolsas que formen os programas deberán estar relacionados con ámbitos tecnolóxicos ou científicos relativos á dixitalización, e particularmente á IA, en tecnoloxías tales como: tecnoloxías de procesamento masivo de datos e información; computación de alto rendemento; computación na nube; ciberseguridade; biotech, dispositivos médicos; robótica ou tecnoloxías cuánticas. Os proxectos executaranse nun prazo de 4 anos e 6 meses a contar desde o día da publicación da resolución.