Samsung presenta as súas memorias internas para móbiles de 1 TB

Cando Samsung presentou o Galaxy Note9 presumía de que tiña o primeiro móbil con 1 TB de capacidade, aínda que tal cantidade acadábase combinando 512 GB de almacenamento interno cunha tarxeta de memoria doutros 512 GB, pero este ano si poderán facer realidade os móbiles con 1 TB de almacenamento interno grazas aos seus novos chips de memoria eUFS 2.1 de 1 TB, que permitirá que os dispositivos móbiles poidan gozar de almacenamentos masivos sen precisar de empregar tarxetas de memoria adicionais.
Dende Samsung esperan que estes novos chips de só 11,5 x 13 milímetros, que dobran a capacidade fronte aos do ano anterior, xoguen un rol crítico na nova xeración de dispositivos móbiles, que cada vez estarán máis próximos aos ordenadores portátiles en moitos aspectos. Actualmente a compañía surcoreana centrará os seus esforzos para conseguir producir suficientes unidades destes chips de memoria como para que poidan ser equipados por algún smartphone insignia dos que veremos nos vindeiros meses.
As novas memoria eUFS 2.1 de 1 TB non só dan un salto en capacidade, senón que tamén melloran en velocidade, pasando de lecturas secuenciais de até 860 MB/segundo das unidades de 512 GB até os 1.000 MB/segundo. Tamén presumen de velocidades de escritura secuencia de 260 MB/segundo e velocidades de lectura e escritura aleatorias de 58.000 e 50.000 IOPS respectivamente. Se temos en conta que as memoria eUFS 2.0 de 128 GB de capacidades lanzadas hai 4 anos tiñan velocidades de lectura secuencia de 350 MB/segundo, podemos constatar que este tipo de unidades deron un importante salto, de xeito que os dispositivos móbiles conseguen uns rendementos moi bos, que deixan incluso en mal lugar á meirande parte dos nosos equipos domésticos e incluso profesionais.