Samsung presenta un televisor que pode xirarse 90 graos

luns, 29 de abril do 2019 Marcus Fernández

Dende Samsung levan un tempo promovendo formatos innovadores para os televisores de consumo, de xeito que na súa familia de televisores QLED 4K/8K podiamos ver o The Frame, que simula ser un cadro pendurado na parede, e a liña Serif lifestyle, que incorpora patas e conta cun deseño bastante sorprendente, obra dos irmáns Ronan e Erwan Bouroullec (dous dos deseñadores industriais máis afamados do mundo, e especializados en mobiliario).
Pero agora móvense cara a un produto aínda máis revolucionario, co novo televisor The Sero, que cun panel QLED de 43 polgadas sorprende por estar integrado nun soporte que facilita o xiro da pantalla en 90 graos, de xeito que podería resultar cómodo para o goce de contidos de Instagram e outros formatos de vídeo deseñados para dispositivos móbiles.
En horizontal The Sero é un televisor normal é corrente, con son 4.1, altofalantes de 60 watts, control mediante Bixby e resolución 4K, resultando toda unha incógnita se o seu uso en vertical terá o suficiente pulo como para xustificar os 1,9 millóns de wons (1.465,49 euros) que custará o trebello cando chegue ás tendas coreanas a finais de maio.

Entre os televisores máis artísticos de Samsung sorprende o concepto rotatorio de The Sero por ser unha capacidade que normalmente está limitada a monitores de uso profesional.

PUBLICIDADE