Samsung renova a súa pulseira deportiva incorporándolle GPS e ampliando a súa pantalla

Aínda que os auriculares Gear IconX sexan o produto máis destacado dos presentados por Samsung nas últimas horas, a súa aposta polos accesorios de fitness non queda aí, e tamén renovaron a súa popular pulseira de actividade, de xeito que a partires do vindeiro día 10 estará dispoñible no mercado a Gear Fit2, pulseira que entre as súas funcións incorpora o seguimento mediante GPS, co que pretenden que os usuarios non teñan que cargar co seu smartphone durante os adestramentos para así poder rexistrar a súa ruta, distancia e velocidade en tempo real.
A Gear Fit2 é unha pulseira cun deseño fino e ergonómico, cómodo para un uso cotián; destaca pola súa pantalla táctil curva Super AMOLED que facilita o acceso aos datos de actividade física rexistrados e que incluso permite responder ás mensaxes recibidas nun smartphone ligado á pulseira; ao integrar GPS e monitor cardíaco ofrece completos datos para facer un seguimento da nosa actividade física e estilo de vida; integra un sistema para detectar a nosa actividade física actual (de xeito que se activa o rexistro da actividade deportiva cando corramos, camiñemos, vaiamos en bicicleta ou incluso empreguemos unha máquina de remo ou unha elíptica; pode sincronizar os datos recollidos con S Health; e completa as súas funcións podendo operar como reprodutor musical autónomo.
Concretando as especificacións, a Gear Fit2 ten unha pantalla Super AMOLED curva de 1,5 polgadas cunha resolución de 216 x 432 píxeles, procesador de dobre núcleo a 1 GHz, 512 MB de RAM, 4 GB de almacenamento interno, GPS, acelerómetro, xiroscopio, monitor cardíaco, Bluetooth 4.2, batería de 200 mAh e un peso moi contido (28 gramos no modelo pequeno e 30 gramos no modelo grande). O accesorio resistente á auga (IP68) funciona co sistema operativo Tizen e é compatible con smartphones con Android 4.4 ou superior cun mínimo de 1,5 GB de RAM.
Estamos ante unha interesante renovación dun produto que no seu día foi moi ben recibido, sendo considerado por moitos como unha magnífica alternativa aos smartwatches, que afastándose dos reloxos conseguía unha maior ergonomía, adaptándose moi ben ao uso diario dos que queren non perder ningunha notificación do seu móbil.