Samsung renova os seus dispositivos con Android

luns, 14 de febreiro do 2011 Marcus Fernández

Samsung leva meses á cabeza dos produtos co sistema operativo Android co seu tablet Samsung Galaxy Tab e o seu móbil Samsung Galaxy S, pero ambos produtos estaban a comezar a quedar atrás por mor da chegada do Motorola XOOM e o Nexus S entre outros produtos, polo que estaban chamados á súa renovación, confirmada en Barcelona co Samsung Galaxy Tab 1.0 e o Samsung Galaxy S II.
O Samsung Galaxy Tab 10.1 é a adaptación do fabricante surcoreano ao novo sistema operativo Android 3.0 (do que o seu anterior tablet queda descolgado), para o que integra un procesador nVIDIA Tegra 2 de dobre núcleo a 1 GHz, dúas cámaras de 8 e 2 Mpíxeles respectivamente (capaces de gravar vídeo a 1.080p a 30 cadros por segundo), conta con 16/32 Gb de almacenamento interno, pantalla de 10,1 polgadas cunha resolución de 1.280 x 800 píxeles, altofalantes estéreo envolventes, xiroscopio, acelerómetro, compás dixital, Wi-Fi N, Bluetooth 2.1, conectividade HSPA+ de ata 21 Mbps e unha batería de 6.860 mAh. Consegue conter o seu grosor en 10,9 milímetros e o seu peso en 599 gramos, Podería comezar a distribuírse en primavera en Europa por parte de Vodafone, aínda que algunhas fontes apuntan a que posiblemente non se venda ata o verán.

O Samsung Galaxy S II pode gravar vídeo a 1.080p

A este interesante competidor do Motorola XOOM acompáñao nos expositores de Samsung no Mobile World Congress o novo Samsung Galaxy S II, que mantense fiel ao seu predecesor, a chegar coma un terminal de grande potencia (funciona cun procesador de dobre núcleo Qualcomm Snapdragon 8260 SoC a 1,2 GHz) nun grosor e peso moi reducidos (queda en 8,49 milímetros e 116 gramos).
O Samsung Galaxy S II tamén ten unha batería de maior capacidade (1.650 mAh), pantalla capacitiva super AMOLED Plus de 4,3 polgadas cunha resolución de 800 x 480 píxeles, cámara de 8 Mpíxeles con flash LED e gravación de vídeo a 1.80p. Tamén goza dunha memoria RAM moi xenerosa (1 Gb), sistema operativo Android 2.3 con interface TouchWiz 4.0, 16/32 Gb de almacenamento ampliable mediante tarxetas microSD e saída de vídeo mini-HDMI. Tamén é compatible coa tecnoloxía AllShare, de xeito que as fotografías, os vídeos e a música do móbil podería compartirse con distintos dispositivos coma os últimos televisores de Samsung.
Na liña do Nexus S, o Samsung Galaxy S II conta con funcións NFC (de xeito que o móbil poderá empregarse para realizar pagamentos electrónicos, entre outras moitas utilidades que iremos vendo nos vindeiros meses), Wi-Fi N, Bluetooth 3.0, A-GPS, conectividade HSDPA+ e microUSB (para a carga e a sincronización de datos). Agárdase que chegue a España en exclusiva con Vodafone, posiblemente no mes de marzo.

O Samsung Galaxy S II segue os pasos do Nexus S incorporando tecnoloxía NFC que servirá para a realización de pagamentos electrónicos
O Galaxy S II é compatible con AllShare

PUBLICIDADE