SkyShowtime estreará un plan Premium con contidos en 4K

A plataforma de vídeo baixo demanda SkyShowtime ten actualmente en España dous plans de subscrición: o Estándar, que por 4,99 euros/mes ou 39,99 euros/ano ofrece reproducións Full HD con anuncios para un dispositivo, e o Estándar Plus, que por 7,99 euros/mes ou 62,99 euros/ano ofrece reprodución Full HD sen anuncios con até 2 pantallas á vez e a posibilidade de descargar até 30 títulos para poder reproducilos fóra de liña.
Pese a que estamos ante unha plataforma cun catálogo bastante pobre (cando menos en relación ao seu prezo), ousan anunciar que o 29 de outubro van lanzar un plan de subscrición Premium, que ofrecerá reprodución de vídeo en 4K, con até 5 dispositivos simultáneos e até 100 descargas para reproducir fóra de liña.
O novo plan pretende atraer aos consumidores que buscan maior calidade de imaxe no contido audiovisual, aínda que como acontece co resto de plataformas, o catálogo de contidos en 4K corresponderá principalmente a novidades, xa que a meirande parte do fondo de catálogo non está dispoñible en ultra alta definición (e incluso hai series que nin sequera están dispoñibles en Full HD).
O prezo mensual do plan Premium de SkyShowtime para España non se detallou, aínda que dende The Hollywood Reporter aseguran que custará a partir de 8,99 euros/mes, podendo variar en función do país (polo que en España podería chegar até os 10,99 euros/mes).